अछाममा मलामी बोकेको ट्याक्टर दुर्घटना : एकको मृत्यु, ३३ जना घाइते

कैलाली- अछाममा मलामी बोकेको ट्याक्टर दुर्घटनामा एक जनाको मृत्यु भएको छ । पञ्चदेवल विनायक नगरपालिकाको कालिकास्थान नजिक मलामी बोकेर घाटतर्फ जाँदै गरेको भे १ त ६७५६ नम्बरको ट्रयाक्टर दुर्घटना हुँदा एक जनाको घटनास्थलमै मृत्यु भएको हो । 

मृत्यु हुनेमा पञ्चदेवल विनायक नगरपालिका–६ का २४ वर्षीय दिर्घ विक रहेका छन् । दुर्घटनामा परेर ३३ जना घाइते भएका छन् ।

घाइतेमध्ये चार जनाको अवस्थाको गम्भीर रहेको अछाम प्रहरीले जनाएको छ । घाइते २४ जनाको जिल्ला अस्पतालमा उपचार भइरहेको छ भने ९ जनाको नजिकको स्वास्थ्य चौकीमा उपचार भइरहेको प्रहरीले जनाएको छ ।

घुम्तिमोडमा ट्याक्टर मोड्ने समयमा दुर्घटना भएको बताइएको छ ।