श्रृंगला फर्केको पर्सिपल्ट फेङ्हे काठमाडौं ओर्लने

काठमाडौँ : भारतीय विदेश सचिव हर्षध्दन श्रृंगला फर्केको पर्सिपल्ट चिनियाँ रक्षामन्त्री तथा पहिलो नम्बरमा रहेका स्टेट काउन्सिलर चिनियाँ वेई फेङ्हे १२ घण्टे भ्रमण गर्न नेपाल आउने भएका छन् । भारतीय विदेश सचिव श्रृंगला मंसिर ११ मा नेपाल आउनेछन् र दुई दिन बिताउनेछन् । उनी मंसिर १४ मा काठमाडौँ आउने कार्यक्रम तय भएको छ । यद्यपि उनको भ्रमाबारे परराष्ट्र र रक्षा मन्त्रालयले कुनै पनि जानकारी बाहिर ल्याएका छैनन् । उनको भ्रमण चिनियाँ राजदूतले तिहारको भोलिपल्ट प्रधानमन्त्री केपी शर्मा ओलीलाई भेट्न बालुवाटार पुग्दा तय भएको थियो ।

चिनियाँले आफ्ना रक्षामन्त्री नेपाल आउन चाहेको जानकारी दिएपछि रक्षा मन्त्रालयको जिम्मेवारी समेत सम्हालिरहेका प्रधानमन्त्रीले निमन्त्रणा पठाएका थिए । उनी प्रधानमन्त्रीको निमन्त्रणामा नेपाल आउन लागेका हुन् । उनी नेपाल हुँदै बंगलादेश त्यसपछि पाकिस्तान जाने कार्यक्रम छ । भारतीय रक्षामन्त्री राजनाथ सिंहको नेपाल भ्रमणको चर्चा चलिरहेका बेला चिनियाँ रक्षामन्त्री नेपाल आउन लागेका हुन् । उनको भ्रमणपछि चिनियाँ विदेशमन्त्री वाङ यीले पनि अर्को महिना नेपाल भ्रमण गर्ने भनिएको परराष्ट्रका अधिकारीले जानकारी दिएका छन् ।
  
नेपाल-चीन सम्बन्धको ६५ औं वर्षगाँठका अवसरमा आयोजित कार्यक्रममा सहभागी हुन रक्षा मन्त्री वेई नेपाल आउन लागेका हुन् । काठमाडौंस्थित चिनियाँ दूतावासले आयोजना गर्ने द्विदेशीय सहयोग समन्वयको कार्यक्रममा उनको सहभागिता रहनेछ । उनको भ्रमणबारेमा प्रधानमन्त्री र राजदूतबीच निकै लामो छलफल भएको थियो ।

तत्कालीन उपप्रधानमन्त्री तथा रक्षामन्त्री ईश्‍वर पोखरेलले गत वर्षको अक्टोबरमा चीन भ्रमण गरेका थिए । पोखरेलले त्यतिबेलै उनलाई नेपाल भ्रमणको निम्ता दिएका थिए । उनै रक्षामन्त्री प्रधानमन्त्री कार्यालय तथा मान्त्रपरिषद् हेर्ने उपप्रधानमन्त्रीका रुपमा छन् । उनीसँग वेईको व्यक्तिगत सम्बन्धसमेत रहेकाले पनि यो भ्रमण अघि बढेको हुनसक्ने रक्षाका अधिकारीले बताए । भ्रमण तयारी प्रधानमन्त्री कार्यालयबाट भइरहेको पनि ती अधिकारीले बताए ।

चीनतर्फबाट विरलै उच्च अधिकारीस्तरको भ्रमण हुनेगर्छ । पछिल्लो समय यो स्तरको भ्रमण हुनुलाई सकारात्मक रुपमा लिनुपर्ने परराष्ट्रका अधिकारीहरू बताउँछन् । नेपाल मात्र होइन, उनी यहाँबाट अन्य मुलुकसमेत जानेछन् । नेपाली सेना र चिनियाँ सेनाबीच जोइन्ट एक्सरसाइज हुन थालेपछिको यो उच्चस्तरको भ्रमण नेपालतिर हुन लागेको हो ।

चिनियाँ राष्ट्रपति सि चिनफिङले गतवर्ष अक्टोबरमा दुई दिने नेपाल भ्रमण गरेपछि चीनबाट नेपालतर्फ उच्चस्तरको भ्रमण भएको थिएन । मन्त्रीस्तरीय भ्रमण हुने र नियमित परराष्ट्र संयन्त्रको सहकार्य हुने भनिए पनि त्यो अनुरुप काम हुन सकेको थिएन । चिनियाँ कम्युनिष्ट पार्टी र नेपालको सत्तारुढ दलबीच सहकार्य बढ्दै जाँदा यो स्तरको भ्रमणले फरक अर्थ र संकेत गर्छ ।

चीनको स्टेट काउन्सिलरसमेत रहेका हुनाले उनी चिनियाँ उच्च नेतृत्वमध्येका एक हुन् । उनी राष्ट्रपति निकट छन् । सैन्य कमाण्डमा पनि सि पछि दोस्रो बरियतामा पर्छन् । उनको नेपाल भ्रमणलाई भारतसँगको चीनको सीमा क्षेत्रमा रहेको विषय मात्र होइन नेपालबाट चीनतर्फ हुन सक्ने विदेशी घूसपेठमा चीन सतर्क छ भन्‍ने संकेत पनि हो । उनले भ्रमणमा नेपालमा रक्षा सहकार्य र यहाँको क्षमता विकासमा सहयोग गर्ने समेत छन् ।

अमेरिका र भारतबीच साझेदारी बढेसँगै चीनले नेपाललगायत भारतको पकड भएका मुलुकमा आफ्नो उपस्थिति थप बलियो बनाउने रणनीति अघि बढाएको छ । चिनियाँ रक्षामन्त्रीले राष्ट्रपति विद्यादेवी भण्डारी, प्रधानमन्त्री एवं रक्षामन्त्री ओली र उपप्रधानमन्त्री ईश्‍वर पोखरेललगायतसँग भेटवार्ता गर्नेछन् । प्रमुख विपक्षी दलका नेतासँग छुट्टै भेट्ने कार्यक्रम बनाइएको छैन । 

औपचारिक भ्रमण हुँदा विपक्षी दलको नेतासँग भेट्ने लोकतान्त्रिक मुलुकको कूटनीतिक अभ्यास छ । सीमाको विषयलाई लिएर कांग्रेससँग निकै चिढिएको चीनले पुराना गाथा गाएर होइन, नयाँ सोचमा अघि बढ्न आवश्यक रहेको सन्देश दिइरहेको छ ।