फिफा विश्वकप : कोलम्बियाविरुद्ध कमब्याक जित निकाल्दै इङ्ग्ल्यान्ड सेमिफाइनलमा

काठमाडौँ- इङ्ग्ल्यान्ड फिफा महिला विश्वकप फुटबलको सेमिफाइनलमा प्रवेश गरेको छ । अस्ट्रेलियाको स्टेडियम अस्ट्रेलियामा आज भएको क्वार्टरफाइनल खेलमा कोलम्बियाविरुद्ध कमब्याक जित निकाल्दै इङ्ग्ल्यान्ड लगातार तेस्रो पटक अन्तिम ४ मा प्रवेश गरेको हो । 

लेसी सान्टोसले ४४औँ मिनेटमा गोल गर्दै कोलम्बियालाई अग्रता दिलाएकी थिइन् । तर, त्यो अग्रता केही समय मात्र टिकेको थियो । पहिलो हाफको इन्जुरी समयमा लरेन हेम्पले गोल गर्दै पहिलो हाफ बराबरीमा सकिएको थियो । 

खेलको ६३ औँ मिनेटमा एलेसिया रुसोले गोल गर्दै इङ्ग्ल्यान्डलाई अग्रता दिलाइन् । १-० ले पछि परेको खेल २-१ ले जित्दै इङ्ग्ल्यान्ड सेमिफाइनलमा प्रवेश गरेको हो । 

यसैसँग क्वार्टरफाइनलका खेलहरू सकिएका छन् । 

मंगलबार हुने पहिलो सेमिफाइनलमा स्पेन र स्वीडेन भिड्दै छन् भने बुधबार हुने दोस्रो सेमिफाइनलमा आयोजक अस्ट्रेलिया र इङ्ग्ल्यान्ड भिड्ने छन् ।