ह्यारी केनले डेब्यु गरेकै खेलमा बायर्न पराजित

काठमाडौँ- इंग्ल्यान्डका कप्तान ह्यारी केनले डेब्यु गरेकै खेलमा जर्मन क्लब बार्यन म्युनिख पराजित भएको छ ।

जर्मन सुपर कपअन्तर्गत बायर्नले आरबी लेइपजिगविरुद्ध ३-० को पराजय भोगेको हो ।

इंग्लिस क्लब टोटेनहम छाडेको केही घण्टापछि नै बार्यनका लागि केन मैदानमा उत्रिएका थिए ।

६४ औँ मिनेटमा मैदान प्रवेश गरेका केनले खेलमा खासै प्रभाव पार्न सकेनन्।

लेइपजिगको जितमा डानी ओल्मीले ह्याट्रिक पूरा गरे । केन मैदान प्रवेश गरेपछि स्पेनिस फरवार्ड ओल्मोले ६८ औँ मिनेटमा पेनाल्टीमार्फत ह्याट्रिक पूरा गरेका थिए ।

यससँगै लेइपजिगले जर्मन सुपर कपको उपाधि उचाल्यो ।