वेस्ट इन्डिजमाथि भारतको शानदार जित, सिरिज बराबरीमा

काठमाडौँ- पाँच खेलको टी-ट्वान्टी सिरिजको चौँथो खेलमा भारतले आयोजक वेस्ट इन्डिजमाथि शानदार जित हात पारेको छ ।

अमेरिकाको लाउडरहिलमा शनिबार राति भएको चौँथो खेलमा भारतले वेस्ट इन्डिजलाई ९ विकेटले पराजित गरेको हो ।

यससँगै सिरिज २-२ को अवस्थामा पुगेको छ । आइतबार हुने अन्तिम खेलको विजेताले सिरिज जित्नेछ ।

शनिबार राति १ सय ७९ रनको लक्ष्य भातरले १७ ओभरमा केवल एक विकेट गुमाएर पूरा गर्‍यो । भारतका लागि यशस्वी जयसवालले सर्वाधिक ८४ तथा शुवमन गिलले ७७ रन जोडे ।

यसअघि टस जितेर पहिले ब्याटिङ गरेको वेस्ट इन्डिजले निर्धारित २० ओभरमा ८ विकेट गुमाएर १ सय ७८ रन जोड्यो ।

वेस्ट इन्डिजका लागि शिमरोन हेटमेयरले सर्वाधिक ६१ रन बनाए । भारतका लागि अर्शदिप सिंहले सर्वाधिक ३ विकेट हात पारे ।