चेल्सीले लिभरपुलसँग अंक खोस्यो

काठमाडौँ- इंग्लिस प्रिमियर लिगअन्तर्गत आइतबार राति भएको खेलमा चेल्सी र लिभरपुलले बराबरी खेलेका छन् ।

चेल्सीको घरेलु मैदान स्ट्यामफोर्ड ब्रिजमा भएको खेल १-१ गोलको बराबरीमा सकिएको हो ।

लुइस डियाजले खेलको १८ औँ मिनेटमा गोल गर्दै लिभरपुललाई अग्रता दिलाएका थिए ।

तर घरेलु टोली चेल्सीका लागि प्रिमियर लिगमा डेब्यु गरेका एक्सेल डिआसीले ३७ औँ मिनेटमा गोल गर्दै खेल बराबरीमा पुर्‍याए ।

त्यसपछि दुवै टोलीले गोल गर्न नसक्दा खेल १-१ को बराबरीमै टुंगिएको थियो ।

यसैगरी, टोटेनहम र ब्रेन्टफोर्डबीचको खेल २-२ को बराबरीमा सकियो । टोटेनहमका लागि क्रिस्टियन रोमेरो र एमर्सन रोयालले गोल गरे भने ब्रेन्टफोर्डका लागि ब्रायन म्ब्यूमो र योने विसाले गोल गरे ।