एमालेको नाराबाजी र विरोधपछि प्रतिनिधिसभा बैठक आइतबारसम्मका लागि स्थगित

काठमाडौँ–  सुन तस्करी प्रकरणमा उच्च स्तरीय समिति गठन गर्नुपर्ने अडान नेकपा एमालेले राखेपछि प्रतिनिधिसभाको सोमबारको बैठक पनि स्थगित भएको छ । सोमबार बैठक सरु भएपछि एमालेका सांसदले उठेर विरोध जनाएका थिए । 

त्यसपछि सभामुखले कांग्रेस सांसद सुनिल शर्मालाई बोल्न दिएका थिए । उनले बोले लगत्तै एमालेका सांसद मानबीर राईले बोल्ने मौका पाएका थिए । उनले सत्तापक्षले सुन प्रकरणमा छानबिन गर्न कुनै मनसाय नदेखाएको र सरकारले अरुको कुरा नसुनेको भन्दै विरोध जनाएका थिए । त्यसपछि सत्ता पक्षबाट माओवादी सांसद हितराज पाण्डेले आतङ्ककारी शब्द प्रयोग भएकोमा नियमापत्ति जनाएका थिए ।

त्यसपछि पनि एमाले सांसदहरूले निरन्तर उठेर विरोध जनाएका थिए । एमाले सांसद नाराबाजीमा उत्रिएपछि बैठक आइतबारसम्मका लागि स्थगित भएको थियो । 
एमालेले सुन तस्करी प्रकरणमा उच्च स्तरीय समिति गठन नभएसम्म प्रतिनिधिसभा चल्न नदिने निर्णय गरेको थियो । जसका कारण प्रतिनिधिसभा र राष्ट्रियसभा लगातार स्थगित भइरहेको छ ।