वीपी प्रतिष्‍ठानका 'इन्टर्न' चिकित्सकले अस्पतालमा सेवा दिन छाडे

काठमाडौँ- धरानस्थित विपि कोइराला स्वास्थ्य विज्ञान प्रतिष्ठानका इन्टर्न संघर्ष समितिका चिकित्सकले प्रतिष्ठानमा सेवा दिन छाडेका छन् । इन्टर्न चिकित्सकले पाउँदै आएको पारिश्रमिक कम भएको भन्दै उनीहरू प्रतिष्ठानमा आन्दोलित थिए ।

इन्टर्न चिकित्सकको जीवन निर्वाहमुखी पारिश्रमिक नभएकाले हिजोदेखि (बुधबार) प्रतिष्ठानमा सेवा दिन छाडेको समितिका डा. प्रशान्त राईले जानकारी दिए ।

यसअघि समितिका सदस्य र प्रतिष्ठानका विद्यार्थी कल्याण समाजले पटक-पटक पदाधिकारीसँग छलफल गरेका थिए । गत १६ गते भएको प्रतिष्ठानमा संघर्ष समितिका चिकित्सक र पदाधिकारीबीच सहमतिसमेत भएको थियो ।

सहमतिमा उनीहरूले २३ हजार रुपैयाँ पाउने उल्लेख गरिएको थियो । यसअघि उनीहरूले १८ हजार ३ सय रुपैयाँ पाइरहेका थिए ।

समितिले गरेको सिफारिस कार्यान्वयनमा नआएको डा. राईले गुनासो गरे । केही दिनअघि मात्र समितिका चिकित्सकले सम्झौता भएको प्रतिवेदनलाई कार्यान्वयन गर्न चेतावनी दिएका थिए ।

सहमति कार्यान्वयन बिरामीको सेवामा नफर्कने चेतावनी दिएका थिए । यसबाट सिर्जित समस्याको जिम्मा लिन प्रतिष्ठान र पदाधिकारी तयार रहनु पर्ने उनीहरूको भनाइ थियो ।

‘प्रतिष्ठानका उपकुलपतिले आफ्नो तर्फबाट गर्नुपर्ने सबै काम सक्नु भएको छ,’ उनले भने,’ तर, रजिष्ट्रार र अस्पतालका निर्देशकले यो कुरालाई गम्भीरताका साथ लिएका छैनन् । त्यसैले संघर्ष समितिका चिकित्सकलाई यो आन्दोलन गर्नुको अर्को विकल्प छैन ।‘