एक अर्काको संस्कृति र धर्मविरुद्ध हुने द्वेषपूर्ण अभिव्यक्तिलाई सरकारले छुट दिँदैन : प्रचण्ड

काठमाडौँ–प्रधानमन्त्री पुष्पकमल दाहाल प्रचण्डले नेपाल बहुजातीय, बहु साँस्कृतिक मुलुक भएकाले एक अर्काको संस्कृति र धर्मविरुद्ध हुने द्वेषपूर्ण अभिव्यक्तिलाई सरकारले छुट नदिने बताएका छन् । 

मंगलबार प्रधानमन्त्रीसँग प्रश्नोत्तर कार्यक्रममा ईश्वरी देवी न्यौपानेले सोधेको प्रश्नको उत्तर दिने क्रममा प्रचण्डले यस्तो बताएका हुन् । प्रतिनिधिसभा सांसद न्यौपानेले प्रधानमन्त्रीलाई हामीले जितेमा जातीय राज्य उपलब्ध गराउने छौँ भन्ने भनाइ संविधान विपरीत भएन भन्दै प्रश्न गरेकी थिइन् ।

‘परापूर्वकालदेखि यहाँ कायम रहि आएको सामाजिक एकता, सद्भाव र सामाजिक सहअस्तित्वमा खलल पार्ने कुनै पनि किसिमको कार्य हुन नदिन सरकार दृढ छ,’ उनले भने, ‘सामाजिक सद्भावमा खलबल पार्ने वा एक अर्काको संस्कृति र धर्मविरुद्ध हुने द्वेष पूर्ण अभिव्यक्ति र कार्यलाई सरकारले कुनै पनि हालतलाई छुट दिन सक्दैन ।’

प्रधानमन्त्री प्रचण्डले अगाडि भने, ‘बहुजातिय, बहुसांस्कृतिक विविधता बोकेको नेपालमा सदियौँ देखि विभिन्न जातजाति धर्म र वर्ण र संस्कृतिका जनताहरू आपसी सहकार्य सम्मान र गहिरो सद्भावका बारेमा मिलिजुली बस्दै आएका छन् । अनेकतामा एकता नेपालीमात्र को विशिष्टता र नेपाली समाजको आधारभूत चरित्र पनि हो । सबैको सह अस्तित्व कायम गर्दै मौलिकताको संरक्षण र सम्वर्द्धनमा नै हाम्रो राष्ट्रिय एकता दिगो र दरिलो भइ साँचो अर्थमा राष्ट्रियता बलियो हुनेछ ।’