धरानका उपमेयर बेघाको भाइमाथि खुकुरी प्रहारबाट गालामा चोट

विराटनगर - धरान उपमहानगरपालिकाका उपमेयर आइन्द्र बिक्रम बेघाको घरैमा गएर उनका भाई बिष्णु बेघामाथि खुकुरी प्रहार भएको छ । धरान–१५ खोरिया बस्तीस्थित उपमेयर बेघाको घरमा १५–२० जना जतिको समूहले आक्रमण गरी उनका भाई बिक्रममाथि खुकुरी प्रहार गरेको जनाइएको छ ।

खुकुरी प्रहारबाट २३ वर्षीय बिष्णुको देब्रे पट्टिको गालामा चोट लागेको जनाइएको छ । इलाका प्रहरी कार्यालय धरानले भने आक्रमणमा संलग्न युवाहरुको खोजी भइरहेको जनाएको छ । आक्रमणकारी पक्राउ गर्नका लागि प्रहरी परिचालन गरिएको र पक्राउ परेपछि आक्रमणको कारण थाहा हुने त्यहाँका प्रहरी नायव उपरीक्षक नवराज मल्लले जानकारी दिए ।

उपमेयर बेघाकी आमा दिलकुमारी बेघाले भने अचानक घरमा केटाहरुको समूह आएर घरका सिसा तोडफोड गर्नुका साथै घरभित्रै प्रवेश गरेर बिष्णुमाथि खुकुरी प्रहार गरेको बताइन् । 

मंगलबार साँझ करिब पाँच बजेतिर आक्रमण भएको र शान्ति सुरक्षाका लागि जानकारी गराउँदा पनि प्रहरी नपुगेको भन्दै उपमेयर बेघाले भने प्रहरीसँग असन्तुष्टि पोखेका छन् ।