यू-१९ साफः विवादित खेलमा माल्दिभ्सलाई हराउँदै नेपाल सेमिफाइनलमा

काठमाडौँ- आयोजक नेपाल साफ यू-१९ च्याम्पियनसीप फुटबलको सेमिफाइनलमा प्रवेश गरेको छ ।

समूह ‘ए’ अन्तर्गत सोमबार त्रिपुरेश्वरस्थित दशरथ रंगशालामा भएको खेलमा नेपालले माल्दिभ्सलाई ४-१ गोलअन्तरले पराजित गर्दै अन्तिम चारको यात्रा सुनिश्चित गरेको हो ।

दुई मध्ये एक खेलमा जित तथा एक खेलमा हार भोगेको नेपाल उपविजेताको रुपमा सेमिफाइनलमा प्रवेश गरेको हो । नेपालले पहिलो खेलमा पाकिस्तानसँग १-० को पराजय भोगेको थियो ।

यता एक खेलमा जित तथा एक खेलमा बराबरीको नतिजा निकालेको पाकिस्तान भने समूह विजेताको रुपमा अघिल्लो चरणमा प्रवेश गर्‍यो । दुई खेलबाट केवल एक अंक जोडेको माल्दिभ्स भने प्रतियोगिताबाट बाहिरिएको छ ।

समूह ‘बी’ बाट भारत र भुटान सेमिफाइनलमा प्रवेश गरिसकेका छन् । बंगलादेश भने बाहिरिसकेको छ ।

सोमबार माल्दिभ्सविरुद्ध नेपाललाई जित दिलाउन प्रशान्त लक्समले १८ औँ तथा समिर तामाङले ३० औँ मिनेटमा गोल गरे ।

त्यसपछि ३५ औँ मिनेटमा नेपालका सुजन डंगोल र माल्दिभ्सका कप्तान मोहमद इयान हसन रातो कार्ड खाँदै मैदान बाहिरिएका थिए ।

५८ औँ मिनेटमा माल्दिभ्सका एडम लायान राशिदले एक गोल फर्काए । ८८ औँ मिनेटमा निराजन धामीले नेपालका लागि तेस्रो गोल गरे ।

दोस्रो हाफको इन्जुरी समयमा समिर तामाङले नेपालका लागि चौँथो गोल थपे ।

खेलको अन्त्यमा माल्दिभ्सका खेलाडीहरुले रेफ्रीसँग विवाद समेत गरेका थिए ।