उपभोग सामान्य घट्यो

काठमाडौँ : कुल गार्हस्थ उत्पादनमा उपभोगको हिस्सा समान्य घटेको छ । आर्थिक सर्वेक्षण २०७७–७८ अनुसार चालु आर्थिक वर्षमा उपभोगको हिस्सा ९३.४ प्रतिशत रहने अनुमान छ । गत आर्थिक वर्षमा कुल गार्हस्थ उत्पादनको ९३.७ प्रतिशत उपभोग रहेको थियो । 

गत आर्थिक वर्षमा कुल ३९ खर्ब १४ अर्बको कुल गार्हस्थ उत्पादनमध्ये ३६ खर्ब ६८ अर्ब रुपैयाँ उपभोग भएकोमा चालु आर्थिक वर्षमा ३९ अर्ब ८४ करोड रुपैयाँ उपभोग हुने अनुमान छ । यद्यपि सरकारले अनुमान गरेको ४.०१ आर्थिक वृद्धिदर हासिल हुन चुनौतीपूर्ण रहेको अर्थ मन्त्रालयले उल्लेख गरेको छ । उक्त आर्थिक वृद्धिदर हासिल हुँदा मात्र आर्थिक वर्ष २०७७–७८ मा कुल गार्हस्थ उत्पादन ४२ खर्ब ६६ अर्ब हुनेछ । 

यद्यपि अनुमानित आर्थिक वृद्धिदर कमजोर भएपनि अर्थतन्त्र संकुचन नहुने अर्थमन्त्रालयको अनुमानले चालु मूल्यमा उपभोगको हिस्सा अघिल्लो वर्षकै हाराहारीमा हुनुले उपभोग उल्लेख्य घटेको संकेत मिल्छ । 

यद्यपि कुल गार्हस्थ उत्पादनमा उपभोगको हिस्सा उल्लेख्य हुँदा बचत र लगानीको अन्तर अझै फराकिलो बनेको छ । गत वर्ष बचत र लगानीको अन्तर २२.१ प्रतिशत रहेकोमा चालु आर्थिक वर्षमा २४.२ प्रतिशत हुने अनुमान आर्थिक सर्वेक्षणले उल्लेख गरेको छ । गत आर्थिक वर्षमा ३०.४ प्रतिशतले लगानी संकुचन भएकोमा चालु आर्थिक वर्षमा १८.१ प्रतिशतले वृद्धि भइ १३ खर्ब १२ अर्ब ७१ करोड रुपैयाँ पुग्ने सरकारको अनुमान छ ।