देशमा विधिविहीनताले पराकाष्ठा नाघ्यो : नेता केसी

फाइल तस्बिर

काठमाडौँ- नेपाली कांग्रेसका नेता अर्जुननरसिंह केसीले देशमा विधिविहीनताले पराकाष्ठा नाघेको बताएका छन् ।​ आइतबार काठमाडौँमा आयोजित १४ औं महाधिवेशनको म्याण्डेट र पार्टी रूपान्तरणको जल्दाबल्दा सवाल विषयक गोष्ठीमा बोल्दै उनले यस्तो बताएका हुन् ।

केसीले देशको सबैभन्दा ठूलो अग्रगामी कदमका रूपमा भ्रष्टाचार अघि बढिरहेको भन्दै दुःख व्यक्त गरे । उनले भ्रष्टाचारमुक्त समाजको निर्माण नभएसम्म सुशासन कायम नहुने बताए । उनले राज्यमा सुशासन भएन भने जनतामा अनुशासन नहुने भन्दै हरेक ठाउँमा अराजक मनोवृत्तिहरू विकास भइरहेको बताए । उनले हामी नेपाली हौँ भन्ने भावनालाई खुला रूपबाट चुनौती दिए पनि कारबाही हुन नसकेको बताए ।

नेता केसीले महंगी र मूल्यवृद्धिले नेपालका आम जनता हतोत्साही अवस्थामा रहेको बताए । उनले रूपान्तरण र वैचारिक पुनः जागरण अहिलेको सबैभन्दा ठूलो आवश्यकता भएको बताए । जबसम्म समानुपातिक निर्वाचन प्रणाली भएसम्म पार्टी नबन्ने बताए । उनले यति ठूलो संख्यामा केन्द्रीय संसद्, प्रदेश सभा आवश्यक नरहेको बताए । उनले पार्टीमा सभापतिले जे निर्णय गर्छ त्यही सर्वमान्य हुने हो भने क्रियाशील सदस्यले सभापति चुन्ने विधानसहित सभापतीय पद्धतिमा जानुपर्ने बताए ।