एमाले गण्डकी : अध्यक्षमा पृथ्वीसुब्बा समूहका शर्मा विजयी

पोखरा- नेकपा एमाले गण्डकी प्रदेशको अध्यक्षमा नवराज शर्मा निर्वाचित भएका छन् । एमाले गण्डकी प्रदेश प्रथम अधिवेशनबाट म्याग्दीका शर्मा विजयी भएका हुन् ।

उनले अध्यक्षका अर्का प्रत्यासी लमजुङका मायानाथ अधिकारीलाई पराजित गरेका हुन् । नवराजले ५ सय ३१ र अधिकारीले ३ सय ६५ मत प्राप्त गरे । नवराजलाई एमाले उपमहासचिव पृथ्वीसुब्बा गुरुङ र मायानाथलाई स्थायी कमिटी सदस्य खगराज अधिकारीको साथ थियो ।

एमाले प्रदेश कमिटीको पदाधिकारीमा शर्माको प्यानललै विजयी भएको हो । उपाध्यक्षमा नवराज प्यानलकै स्याङ्जाका मिनप्रसाद गुरुङले ५ सय ३४ र उनका प्रत्यासी नवलपुरका बाबुराम विश्वकर्माले ३ सय ६२ मत प्राप्त गरे ।

सचिवमा शर्मा प्यानलको लमजुङका धनन्जय दवाडी विजयी भए । दवाडीले ५ सय २० मत ल्याए भने, सचिवका अर्का उम्मेदवार कास्कीका रश्मि आचार्यले ३ सय ६७ मत प्राप्त गरे ।

उपसचिवमा शर्मा पक्षका दामबहादुर विकले ४ सय ९९ मत लिएर निर्वाचित हुँदा उनका प्रत्यासी सन्तोष रावलले ३ सय ९७ मत ल्याए । उपसचिव महिलातर्फ मन्जु अधिकारी ५ सय ३१ मतसहित विजयी भइन् । भने मिना गुरुङले ३ सय ६५ मत ल्याइन् । 

बिहीबार भएको मतदानमा ८ सय ९६ मत खसेको थियो । ३३ वटा विद्युतिय मेसिनमार्फत मतदान भएको थियो । सदस्यमा पनि अधिकांश शर्मा प्यानल कै विजयी भएका छन् ।