यस्तो छ कर्णालीमा लागू भएको चाडपर्व सुरक्षा कार्ययोजना

सुर्खेत- कर्णालीमा ‘एकिकृत चाडपर्व सुरक्षा कार्य योजना –२०८०’ लागू भएको छ । चाडपर्वमा हुने सम्भावित घटना न्यूनिकरण गर्नको लागि प्रदेश प्रहरी कार्यालयले उक्त योजना लागू गरेको छ । गएको वर्षको तुलनामा यस वर्ष बढी मात्रामा जनशक्ति परिचालन गरिएको प्रदेश प्रहरी कार्यालयले जनाएको छ ।

प्रदेश प्रहरी कार्यालय तथा मातहत प्रहरी कार्यालयहरुबाट १ हजार ३६९ वटा ड्यूटीमा ४ हजार ५७५ जना प्रहरी जनशक्ति परिचालन गरिएको छ । प्रदेश प्रहरी कार्यालयका प्रवक्ता गोपालचन्द्र भट्टराईका अनुसार सुरक्षा व्यवस्थालाई प्रभावकारी बनाउन ३२३ स्थानमा मोवाईल गस्ती, क्यूआरटी र पैदल गस्ती समेत गरिने छ ।

२० स्थानमा सादा पोसाकका प्रहरी परिचालन गरिएको छ भने १२ स्थानमा कर्डन एण्ड सर्च तोकिएको छ । साथै १०२ वटा क्युआरटी परिचालन गरिएको छ भने ६८ वटा चेक प्वाइन्टहरुमा नियमित चेकजाँचको व्यवस्था मिलाइएको छ ।

त्यसैगरी आकस्मिक घटनाहरुको लागि १७ वटा टोलीमा एक सय ३४ जना प्रहरीलाई तयारी अवस्थामा राखिएको छ । यसैगरी ८३ वटा स्थानमा ट्राफिक सहितको संयुक्त चेकिङको थालनी भइरहेको छ । १८ स्थानमा बजार अनुगमन भइरहेको छ भने सवारी साधनको लागि बिशेष चेकिङको व्यवस्था भएको छ ।

सहज यातायातका लागि ६१ स्थानहरुमा यात्रु सहायता कक्ष स्थापना गरिएको छ । भट्टराईका अनुसार चोरी, तस्करी, लागूऔषध कारोबार लगायतका अवैध गतिविधि नियन्त्रणको चेकिङका लागि १८ स्थानमा सुरक्षा व्यवस्था गरिएको छ ।

यस्तै आर्थिक कारोबार हुने स्थान, धार्मिक तथा पर्यटक स्थल, महत्पुर्ण स्थानहरुको सुरक्षाका लाथि ९२ स्थानमा सुरक्षा व्यवस्था गरिएको छ ।

नागरिकको सुरक्षाको अधिकारको सम्मान गर्दै कर्णाली प्रदेश अन्तर्गतका जिल्लाहरुको सुरक्षा व्यवस्थालाई भरपर्दो, विश्वसनिय र सुदृढ बनाई आम नागरिगको जनजीवन सामान्य तुल्याउन विशेष सुरक्षा रणनीति तयार पारिएको उनले बताए ।

चाडपर्वको समयमा कुनै पनि किसिमको अप्रिय घटना हुन् नदिन योजनाबद्ध प्रहरी परिचालन, अनुगमन, नियन्त्रण आवश्यक भएको सुरक्षा मापदण्डसमेतलाई लक्षित गरी सुरक्षा योजना बनाई लागू गरिएको उनको भनाई छ ।