आर्यनको रोजाइमा जयशमशेर जबरादेखि अमरदिपसम्म

काठमाडौं : नाटक, टेलिसिरियल हुँदै ‘किस्मत’ फिल्ममार्फत नेपाली फिल्ममा पदार्पण गरेका आर्यन सिग्देल लामो समय निर्माताको रोजाइमा एक नम्बरमा रहे । ‘मेरो एउटा साथी छ’बाट स्टारडमको शिखर चढेका आर्यन पछिल्ला दिनमा भने एउटा हिटको खोजीमा छन् । ४० हाराहारी सिनेमा गरेका आर्यन अभिनित पछिल्ला कुनै पनि फिल्मले हिटको ट्याग पाएका छैनन् ।

परम्परागत सोच अनुसार हिरो हुनका लागि अनिवार्य मानिने गोरो अनुहार, अभिनय र नृत्य तीनै गुण भएका आर्यनलाई दर्शकले थुप्रै फिल्ममा अत्यधिक रुचाएका छन् । तर, ‘आर्यन आफैँले आफूलाई पर्दामा कत्तिको रुचाएका छन् ? इकागजको यो प्रश्नमा उनले आफूलाई मन पर्ने पाँच चरित्रको बारेमा बताए ।  

जयशमशेर जंगबहादुर राणा (मेरो एउटा साथी छ) 
आर्यनलाई आफूले खेलेको चरित्रमध्ये ‘मेरो एउटा साथी छ’को जयशमशेर जंग बहादुर राणा सबैभन्दा मन पर्छ । आर्यनले यो फिल्म खेल्नु अघि ‘किस्मत’ र ‘मौसम’ गरी दुई फिल्ममा अभिनय गरिसकेका थिए । जसमध्ये ‘किस्मत’ सुपरहिट भएको थियो भने ‘मौसम’ औसत मानिएको थियो । तर, ‘मेरो एउटा साथी छ’ पछि मात्र आर्यनले स्टारडमको स्वाद चाख्न पाएका थिए । आर्यन फिल्ममा देखिने जयको एटिच्युड आफ्ना लागि प्रिय भएको बताउँछन् ।

‘खासमा यो फिल्म कोरियन फिल्मबाट उठाइएको हो भन्ने थाहा थियो । तर, निर्माता÷निर्देशकले कोरियन फिल्म नहेर्नु भनेका थिए । धेरै दिनसम्म जयको एटिच्युड खोज्दै भौतारिएँ । तर, लास्टमा आफैं भित्र एक्स्प्लोर गरेँ,’ उनले भने । आर्यनका अनुसार धनीको एटिच्युड खोज्न उनी धनीमानी जाने केही क्लब र रेष्टुँरा पनि गए । तर, उनले आफू र उनीहरूमा केही अन्तर पाएनन् । उनीहरूमा सिनेमाटिक एटिच्युड पाएनन् । तर, एक दिन अचानक उनले आफैंमा जयले खोजेको गुण पाएको महसुस गरे । ‘सुटिङमा जब मैले त्यो एटिच्युड देखाएँ, निर्देशक आफैं चकित परेका थिए,’ आर्यनले सम्झिए । रिलिजपछि फिल्म र आर्यन दुवैले प्रशस्त चर्चा पाएका थिए । 

अभि  (धुवाँ यो नशा)
आफूलाई मन पर्ने दोस्रो चरित्रको कुरा गर्दा आर्यनले ‘धुवाँ यो नशा’को नाम लिए । आर्यनका अनुसार पहिलो फिल्ममा जस्तै उनले यो फिल्ममा पनि उनले जिन्दगी नदेखेको चरित्र निर्वाह गरेका थिए । फिल्मभित्र आर्यन लागु पदार्थ दुव्र्यसनीको भूमिकामा छन् । 

आर्यनले यो चरित्र आत्मसात गर्न पनि सकस भएको थियो । ‘ड्रग एडिक्ट बन्नलाई धेरै रिहाब धाएँ र एडिक्टसँग पनि संगत गरें, ! आर्यनले आफूले गरेको तयारीका बारेमा बताउँदै भने, ‘तर, देख्नु र कलाकारले आत्मसात गर्न सक्नु फरक कुरा हुन् । मलाई त्यो चरित्रको लय समात्न गाह्रो भएको थियो । त्यसैले पनि यो चरित्र विशेष लाग्छ ।’ दसैँको समयमा रिलिज भएको फिल्म रिलिजको चेपुवामा पर्दा हलमा भने असफल भएको थियो । आर्यनलाई यो फिल्मको चरित्र मात्र होइन फिल्म आफैंमा पनि राम्रो लाग्छ । ‘मन पर्ने फिल्मको लिस्टमा पनि यो फिल्म दुई÷तीन भित्रै पर्छ’ आर्यनले भने ।

डाक्टर निल (माला)
आर्यनले आफैंलाई मन पर्ने चरित्रको लिस्टमा ‘माला’ फिल्मको डाक्टर निललाई तेस्रो नम्बरमा राखेका छन् । यो फिल्ममा डाक्टर निलको ‘सटलनेस’आफूलाई विशेष लागेको आर्यनले बताए । ‘मैले बीचमा थुप्रै फन्टुस खाले युवकको भूमिका निभाएँ जुन आवरणमा फरक थिए तर सारमा एकै । तर, यो फिल्ममा मेरो चरित्र डार्क मात्र थिएन डिटेलिङसहितको पनि थियो,’आर्यनले मन पर्ने कारण बताउँदै भने ।

रोमान्टिक भूमिकामा प्रभावहीन हुँदै गएका आर्यनले यो फिल्मपछि आर्यनमा अझै अभिनयको दमखम रहेको प्रमाणित गरेका थिए । आर्यन भन्छन् ‘ फिल्म हेरेपछि धेरैले आर्यनले गरेको अहिलेसम्मको अप्ठेरो रोल भन्ने प्रतिक्रिया दिएका थिए । किनकि यो एकातिर हरर थियो त अर्कोतिर मानवीय । चुनौतीपूर्ण रोल गरेर पनि स्याबास्सी पाएका कारण यो मेरो प्रिय रोलमध्ये एक हो ।’ हरर विधाको फिल्ममा प्रियंका कार्कीले पनि मन छुने अभिनय गरेकी थिइन् ।

हरिकृष्ण शर्मा (होमवर्क)
‘होमवर्क’ आर्यनले बाबु छोराको दोहोरो भूमिका निर्वाह गरेका छन् । ६० वर्षभन्दा ज्यादा उमेरको उद्योगपति हरिकृष्ण शर्मालाई एउटा समारोहमा कसैले अनपढ भनेर हियाएपछि उनी बुढ्यौलीमा स्कुल भर्ना हुन्छन् । आर्यनले यही स्कुल जाने बृद्धको भूमिका निर्वाह गरेका थिए ।

आफ्नो उमेरभन्दा दोब्बर उमेरको भूमिका निर्वाह गर्दा पाएको सन्तुष्टिका कारण उनले यसलाई पनि आफ्नो मन पर्ने भूमिका भित्र राखेका छन् । ‘म बाबुको भूमिकामा यति धेरै डुबेको थिएँ कि छोराबन्दा पनि बुढो मान्छेकै इनर्जी बोकेर काम गरिरहेको थिएँ । पछि निर्देशकले सम्झाएपछि मात्र म जवान हुँ भन्ने सम्झन्थेँ,’ उनले भने । आर्यनले यो फिल्ममा गौरी मल्ल र नम्रता श्रेष्ठको जोडीको रुपमा अभिनय गरेका छन् ।

अमरदिप कार्की (पुनर्जन्म)
बक्स अफिसमा चुपचाप सेलाएको ‘पुनर्जन्म’मा आर्यनले आर्मी अफिसरको भूमिका निभाएका छन् । आफ्नो स्कुल स्मृतिसँग जोडिएका कारण पनि यो फिल्मको चरित्र आफूलाई मन परेको आर्यनले बताए ।‘मैले सल्लाघारीको वीरेन्द्र सैनिक स्कुलबाट एसएलसी गरेको हुँ । सेनाको हरकुरासँग परिचित थिएँ ।

जब यो फिल्ममा आर्मी बन्ने मौका पाएँ, स्कुले दिनमा फर्किए जस्तो भयो,’ उनले भने, ‘यो फिल्ममा हाम्रो संस्कार/संस्कृतिको पनि विस्तृत डकुमेन्टेसन छ । त्यही कारण पनि मेरा लागि यो फिल्मको अमरिदिप प्रिय छ ।’ 

प्रस्तुति : सामीप्यराज तिमल्सेना