सहायता परिचालनमा केन्द्रित हुन माओवादी केन्द्रको आह्वान

म्याग्दी- नेकपा (माओवादी केन्द्र) गण्डकी प्रदेश समितिले भूकम्प प्रभावित क्षेत्रमा उद्धार, राहत र विस्थापितहरूको व्यवस्थापनमा केन्द्रित हुन पार्टीका नेता कार्यकर्ताहरूलाई आह्वान गरेको छ । 

गण्डकी प्रदेश समितिका अध्यक्ष गायत्री गुरुङले आज विज्ञप्ति जारी गर्दै घाइतेको खोज तथा उद्धार, अविलम्ब प्रभावकारी स्वास्थ्योपचार, विस्थापितको पुनःस्थापनाको व्यवस्था, खाद्यान्न, बसोबासलगायत आवश्यक सामग्रीको व्यवस्था यथाशिघ्र मिलाउन नेपाल सरकारसहित तीनै तहका सरकार समक्ष माग गर्दै यसका लागि सहयोग पुर्याउन र सक्रियतापूर्वक परिचालित हुन पार्टी पंक्तिलाई आह्वान गरेकी हुन् ।

जाजरकोटको रामीडाँडा केन्द्रबिन्दु भई शुक्रबार राति ६ दशमलब ४ रेक्टर स्केलको भूकम्प जाँदा जाजरकोट, पश्चिम रुकुमलगायत जिल्लामा भएको जनधनको क्षतिको पीडादायी घटनाबाट माओवादी केन्द्र गण्डकी प्रदेश समिति स्तब्ध भएको विज्ञप्तिमा उल्लेख छ । 

प्राकृतिक विपत्तिले निम्त्याएको दु:खद घटनामा ज्यान गुमाएका मृतकप्रति श्रद्धाञ्जली, परिवारजनमा समवेदना प्रकट र घाइतेको शिघ्र स्वास्थ्य लाभको कामना अध्यक्ष गुरुङले गरिन् ।