ठाकुर समूहद्वारा यादवलाई पार्टीबाट निष्कासन

काठमाडौँ  : जनता समाजवादी पार्टीमा कारबाहीको होडबाजी चलेको छ । संघीय परिषद् अध्यक्ष डा. बाबुराम भट्टराई र अध्यक्ष उपेन्द्र यादव समूहले अर्का अध्यक्ष महन्थ ठाकुरसहित चार जनालाई पार्टीबाट निष्कासन गरेको केहीबेरमै ठाकुर पक्षले पनि यादवलाई पार्टीबाट निष्कासन गरेको हो । अध्यक्ष यादवलाई पार्टीबाट निष्कासन गरेको महन्थ ठाकुरनिकटका कार्यकारिणी सदस्य केशव झाले इकागजलाई जानकारी दिए । ठाकुर समूहले  यादवलाई निश्कासन गरेको पत्र निर्वाचन आयोगमा दरता गरिसकेको छ । 

भट्टराई–यादव समूहले आज कार्यकारिणी बैठक बोलाएर ठाकुरसहित राजेन्द्र महतो, सर्वेन्द्रनाथ शुक्ल र लक्ष्मणलाल कर्णलाई पार्टीबाट हटाएको हो । भट्टराई-यादव समूहले चारै नेतालाई पार्टीबाट हटाइएको जानकारी निर्वाचन आयोगलाई जानकारी गराइसकेको छ ।  कार्यकारिणी समितिमा भट्टराई-यादव समूहको बहुमत छ । जसपाभित्र केपी शर्मा ओली नेतृत्वको सरकारमा सहभागी हुने या नहुने भन्ने विषयमा विवाद छ ।