अस्थायी टहरा निर्माण र पुनःस्थापनाका लागि एमालेद्वारा स्वयंसेवक परिचालन

काठमाडौँ- जाजरकोट र पश्चिम रुकुमका भूकम्प पीडितहरूका लागि अस्थायी टहरा निर्माण गरी पुनःस्थापनाको कामका लागि नेकपा एमालेले स्वयंसेवक परिचालन गरेको छ ।

भूकम्प प्रभावित क्षेत्र जाने एमालेका स्वयंसेवक टोलीलाई अध्यक्ष केपी शर्मा ओलीले राहत सामग्रीसहित शनिबार पार्टी कार्यालय च्यासलबाट बिदाई गरे ।

टोलीले स्थलगत अध्ययन गरेर स्थानीय पार्टी, पीडित र प्रशासनसँग समन्वय गरी काम सुरु गर्ने तयारी गरेको एमालेले जनाएको छ । केन्द्रीय विपत व्यवस्थापन तथा स्वयंसेवा विभाग प्रमुख किरण पौडेलले रुकुम पश्चिम र जाजरकोटका सबै स्थानमा ११ सय स्वयंसेवकले दुई हप्ता काम गर्ने जानकारी दिए । पार्टीका विभिन्न जनसंगठन र मातहतका कमिटीहरूका स्वयंसेवकहरू ४० समूहमा बाँडिएर श्रमदानमा खटिने उनले बताए ।

उनले भत्किएका भग्नावशेष हटाउने, मरेगलेका चौपाया हटाउने र पुनर्निर्माणको काम नहुन्जेलसम्म अस्थायी टहरा निर्माण गर्ने जानकारी दिए ।