सिके राउतको आक्रोश : मन्त्री र सांसदलाई जति बेला पनि समात्ने सरकारले जनतालाई कस्तो स्वतन्त्रता दिएको होला ?

फाइल तस्बिर

काठमाडौँ- जनमत पार्टीका अध्यक्ष डा. चन्द्रकान्त राउतले सरकारले मधेसीहरूलाई रंग विभेद गरेको आरोप लगाएका छन् । सोमबार माइतीघर मण्डलामा प्रदर्शनका क्रममा पक्राउ परेसँगै प्रहरी हिरासतबाट छुटेपछि सञ्चारकर्मीहरूसँग कुरा गर्दै उनले यस्तो आरोप लगाएका हुन् ।

अध्यक्ष राउतले आफूहरूले निषेधित क्षेत्र नतोडेको बरू कला परिषदबाटै प्रहरीले आफूहरूलाई धरपकड गरेको बताए । उनले मन्त्री र सांसदलाई जुन कुनै बेला पनि समात्ने सरकारले जनतालाई कस्तो स्वतन्त्रता दिएको होला ? भन्दै प्रश्नसमेत गरे । उनले सरकारले रंगभेदी विभेद गरेको भन्दै यो कुरा संसद् र समितिमा प्रस्तावका रूपमा लैजाने बताए ।

उनले मधेसी मुलकी मन्त्री भएकै कारण संघीय मामिला तथा सामान्य प्रशासनमन्त्री अनिता देवीलाई पक्राउ गरेको बताए । उनले अन्य पार्टीको राष्ट्रिय अध्यक्षलाई यसरी समात्न सक्छ ? भन्दै प्रश्न गरे । मधेसी मुलका बाहेकका मन्त्री र अध्यक्षलाई यसरी नै पक्राउ गरेर देखाउन चुनौती दिए ।

सरकारले केही नगर्दा पनि आफ्नै मन्त्री पक्राउ गर्न मिल्छ ? भन्दै प्रश्न गरे ।