नौ वर्षीया बालिका बलात्कार गर्ने ८६ वर्षीय वृद्धलाई २५ वर्ष जेल

सांकेतिक तस्विर

काठमाडौं - ९ वर्षीया बालिकालाई बलात्कार गर्ने एक वृद्धलाई दैलेख जिल्ला अदालतले जन्मकैदको  सजाय सुनाएको छ ।  

सोमबार न्यायाधीश बलराम लम्सालको इजलासले नारायण नगरपालिका–८ ढकानेका ८६ वर्षीय प्रजापति रेग्मीलाई २५ वर्ष कैद, सात लाख रूपैयाँ जरिमाना, ५० हजार पीडितलाई क्षतिपूर्ति र २८ सय रूपैयाँ पीडित राहत कोषमा जम्मा गर्नुपर्ने फैसला सुनाएको हो।

दैलेख जिल्ला अदालत सूचना अधिकारी हरिप्रसाद उपाध्यायका अनुसार बालिकालाई बलात्कार गरेको आरोपमा रेग्मी २०७९ चैतमा पक्राउ परेका थिए।

उनले भने, ‘२०७९ साल चैतमा प्रहरीले पक्राउ गरेको थियो। चैत २३ गते हस्पिटलबाट रिपोर्ट आउँदा बालिकालाई बलात्कार गरेको पुष्टि भएको थियो। त्यहीअनुसार रेग्मीविरुद्ध जिल्ला सरकारी वकिल कार्यालयले २०८० वैशाख १४ गते दैलेख जिल्ला अदालतमा जबरजस्ती करणीसम्बन्धी अभियोग दर्ता गरेको थियो।’