टी-ट्वान्टी सिरिज : अफगानिस्तानविरुद्ध भारतको जित

काठमाडौँ- भारतले पाहुना टोली अफगानिस्तानविरुद्धको तीन खेलको टी-ट्वान्टी सिरिजको पहिलो खेलमा जित हात पारेको छ ।

बिहीबार राति मोहालीमा भएको खेलमा भारतले अफगानिस्तानलाई ६ विकेटले पराजित गरेको हो । यससँगै भारतले सिरिजमा १-० को अग्रता लिएको छ ।

बिहीबार राति अफगानिस्तानले दिएको १ सय ५९ रनको लक्ष्य भारतले १७ ओभर ३ बलमा ४ विकेट गुमाएर पूरा गर्‍यो ।

भारतलाई जित दिलाउन प्लेयर अफ द म्याच घोषित भएका शिवम दुवेले ४० बलमा अविजित ६० रनको योगदान गरे । जितेश शर्माले ३१ रन जोडे ।

अफगानिस्तानका मुजिब उर रहमानले २ तथा अजमातुल्लाह ओमरजाईले १ विकेट हात पारे ।

यसअघि टस हारेर पहिले ब्याटिङ गरेको अफगानिस्तानले निर्धारित २० ओभरमा ५ विकेट गुमाउँदै १ सय ५८ रन जोड्दा मोहम्मद नावीले सर्वाधिक ४२ रन बनाए ।

भारतका मुकेश कुमार र अक्सर पटेलले समान २-२ तथा शिवम दुवेले १ विकेट हात पारे ।