इरान-पाकिस्तान तनावः ११ सर्वसाधारणको मृत्यु, दुई छिमेकीबीचको सम्बन्ध जटिल बन्दै

फाइल तस्बिर

काठमाडौँ - इरान र पाकिस्तानले यस हप्ता एक अर्काको क्षेत्रमा हवाई आक्रमण गर्दा कम्तीमा ११ व्यक्ति मारिएका छन् । यी आक्रमणले दुई छिमेकीबीचको सम्बन्धलाई थप जटिल बनाएको छ । 

इरान र पाकिस्तानको सीमामा विद्रोही समूहको उपस्थितिका कारण दुई देशबीचको सम्बन्धमा तनाव छ । 

मंगलबार इरानले पाकिस्तानमा रहेको सुन्नी चरमपन्थी संगठनको अखडामा आक्रमण गरेको थियो भने बिहीबार पाकिस्तानले इरानभित्रै जवाफी कारबाही गरेको थियो ।

दुवैले आतंककारी समूहमाथि आक्रमण गरेको तर, त्यहाँका सर्वसाधारणमाथि आक्रमण नगरेको बताएका छन् । 

इरान र पाकिस्तानको सीमा क्षेत्रमा सक्रिय सशस्त्र विद्रोही समूहहरू बलुचहरूका लागि स्वतन्त्र बलुचिस्तान देश चाहन्छन्। बलुचिस्तान क्षेत्र पाकिस्तान, इरान र अफगानिस्तान तीन देशमा पर्छ।

इरान र पाकिस्तानले आफ्नो क्षेत्रमा विद्रोही समूहमाथि आक्रमण गर्नुको सट्टा एकअर्काको क्षेत्रमा आक्रमण गरेका छन् । यसले दुई देशबीचको वैमनस्य बढाउने निश्चित छ । 

इरान र पाकिस्तानबीच नौ सय किलोमिटर लामो सीमाना छ। सीमा क्षेत्रमा सरकारको उपस्थिति छैन । तस्कर र चरमपन्थी खुलेआम घुमिरहेका हुन्छन् । 

दुवै देशले एकअर्कालाई विद्रोही समूहहरूलाई सहयोग गरेको वा उनीहरूप्रति उदार मनोवृत्ति रहेको विश्वास गर्छन्। 

जैश अल-अदल सुन्नी पृथकतावादी समूह हो र इरानले मंगलबार यस समूह लुकेको ठाउँलाई निशाना बनाएको थियो। यो संगठन पाकिस्तानबाट सञ्चालन हुने र इरानी सुरक्षा बलमाथि आक्रमण गर्ने विश्वास गरिन्छ।