भारतीय ब्याटर यशस्वी जयसवालले हिर्काए दोहोरो शतक

काठमाडौँ- भारतीय युवा ब्याटर यशस्वी जयसवालले टेस्ट क्रिकेटमा पहिलो दोहोरो शतक हिर्काएका छन् ।

पाहुना टोली इंग्ल्यान्डविरुद्धको दोस्रो टेस्ट खेलका क्रममा जयसवालले दोहोरो शतक प्रहार गरेका हुन् ।

छैटौं टेस्ट खेल्दै गरेका जयसवालले २ सय ७७ बलको सामना गर्दै १८ चौका र ७ छक्काको मदतमा २ सय रन (दोहोरो शतक) पूरा गरेका हुन् ।

२२ वर्षीय जयसवालले टेस्ट क्रिकेटको एकै इनिङ्समा यसअघि सर्वाधिक १ सय ७१ रन हिर्काएका थिए ।  

उमेरका हिसाबले भारतका लागि टेस्ट क्रिकेटमा दोहोरो शतक पूरा गर्ने खेलाडीमध्ये जयसवाल तेस्रो नम्बरमा पर्छन् ।

यसअघि सुनिल गवास्कर र विनोद काम्बलीले २१ वर्षको उमेरमा दोहोरो शतक प्रहार गरेका थिए ।