एसीसी प्रिमियर कप : नेपालले भोलि माल्दिभ्सविरुद्ध खेल्दै

काठमाडौँ- मलेसियामा जारी एसीसी महिला प्रिमियर कप क्रिकेट प्रतियोगिताअन्तर्गत नेपालले मंगलबार माल्दिभ्सविरुद्ध खेल्दैछ ।

समूह 'डी' मा रहेका नेपाल र माल्दिभ्सबीचको खेल बान्गीस्थित युकेएम-वाइयसडी क्रिकेट ओभलमा नेपाली समयअनुसार बिहान ११:१५ बजेबाट सुरु हुने तालिका रहेको छ ।

यसअघिका दुवै खेल जितेर क्वार्टरफाइनलमा स्थान सुरक्षित गरिसकेको नेपालले मंगलबारको खेलमा माल्दिभ्सलाई पराजित गर्दै समूह विजेता बन्ने योजनामा छ ।

यता माल्दिभ्स भने अघिल्ला दुवै खेल हार्दै समूह चरणबाटै बाहिरिसकेको छ । तर, समूह चरणको अन्तिम खेलमा भने नेपाललाई पराजित गरेर सान्त्वना जित हात पार्न चाहन्छ ।

नेपालले पहिलो खेलमा हङकङलाई ८ विकेट तथा दोस्रो खेलमा भुटानलाई पनि ८ विकेटले नै पराजित गरेको थियो ।

माल्दिभ्सले भने पहिलो खेलमा भुटानसँग ९४ रनको पराजय भोग्दा दोस्रो खेलमा हङकङसँग १ सय ७२ रनको पराजय बेहोरेको थियो ।