अनिल र भिमको शतकमा क्यानाडामाथि नेपालको शानदार जित

तस्बिरः क्यान

काठमाडौँ- घरेलु टोली नेपालले क्यानाडाविरुद्धको तीन खेलको एकदिवसीय अन्तर्राष्ट्रिय सिरिज 'क्लिन स्विप' गरेको छ ।

कीर्तिपरस्थित त्रिवि क्रिकेट मैदानमा सोमबार भएको अन्तिम खेलमा क्यानाडालाई ९ विकेटले पराजित गर्दै नेपालले सिरिज क्लिन स्विप गरेको हो । नेपालले यसअघिका दुवै खेल जितेको थियो ।

सोमबार नेपाललाई जित दिलाउन भिम सार्की र अनिल साहले शतक पूरा गरे । भिम र अनिल दुवैले एकदिवसीय अन्तर्राष्ट्रियमा पहिलो शतक पूरा गरेका हुन् ।

जितका लागि चाहिएको २ सय ३३ रनको लक्ष्य नेपालले ४४ ओभर ३ बलमा १ विकेट गुमाएर पूरा गर्‍यो । नेपालका जितमा भिम सार्कीले १ सय २९ बलमा ११ चौका र १ छक्काको मदतमा १०१ रन बनाए । अनिल साहले १ सय १२ रन बनाउँदा १ सय २४ बलमा १२ चौका र १ छक्का हिर्काए ।

कुशल भुर्तेल १३ रनमा आउट भए । क्यानाडाका डिलोन हेयलाइगरले १ विकेट हात पारे ।

यसअघि कीर्तिपुरस्थित त्रिवि क्रिकेट मैदानमा टस हारेर पहिले ब्याटिङ गरेको क्यानाडाले निर्धारित ५० ओभरमा ८ विकेट गुमाएर २ सय ३२ रन जोड्यो ।

क्यानाडाका लागि नवनित धलिवालले ५० रन, निखिल दत्तले ४५ रन, कप्तान साद बिन जाफरले ३१, हर्श ठाकरले २९ तथा श्रिमान्था विजेयेरत्नेले २२ रन बनाए ।

नेपालका लागि हेमन्त धामीले ३ विकेट, कुशल मल्लले २ तथा ललित राजवंशी र आकाश चन्दले १-१ विकेट हात पारे ।