महिला टी-ट्वान्टी अन्तर्राष्ट्रियमा रुविना क्षेत्रीको कीर्तिमानी शतक

काठमाडौँ- महिलाको टी-ट्वान्टी अन्तर्राष्ट्रिय क्रिकेटमा नेपालका लागि शतक पूरा गर्ने रुविना पहिलो खेलाडी बनेकी छन् । 

मलेसियामा जारी एसीसी महिला प्रिमियर कप क्रिकेट प्रतियोगिताअन्तर्गत रुविनाले माल्दिभ्सविरुद्ध शतक पूरा गरेकी हुन् ।

टी-ट्वान्टी अन्तर्राष्ट्रियमा नेपाली महिला क्रिकेटरले शतक पूरा गरेको यो पहिलो पटक हो । रुविनाले माल्दिभ्सविरुद्ध ५९ बलमा अविजित रहँदै १० चौका र ५ छक्काको मदतमा १ सय १८ रन बनाइन् ।

उनको शतकसँगै नेपालले निर्धारित २० ओभरमा ४ विकेट गुमाएर २ सय २७ रन समेत बनायो । नेपालका लागि पूजा महतोले ५९ रन जोडिन् ।

अन्तर्राष्ट्रिय क्रिकेटमा नेपाली महिला खेलाडीले प्रहार गरेको यो नै पहिलो शतक पनि हो ।