कारागारमा रहेका क्रेमलिनका आलोचकद्वारा नाभाल्नीको मृत्युपछि ‘निराशा’ विरुद्ध चेतावनी

फाइल फोटो

गाजा - कारागारमा रहेका विपक्षी राजनीतिज्ञ भ्लादिमिर कारा–मुर्जाले बिहीबार रुसीहरूसँग आर्कटिक कारागारमा एलेक्सी नाभाल्नीको मृत्यु भए पनि लोकतन्त्रका लागि लडिरहन आग्रह गरेका छन् । 

 गत साता नाभाल्नीको मृत्युले रुसको विपक्षमा निराशा उत्पन्न गराएको छ । यिनीहरूमा अधिकांश निर्वासन र कारागारमा छन् वा मरिसकेका छन् । “तर्कसङ्गत वा भावनात्मकरूपमा के भएको हो भन्नेबारे मैले अझै पनि बुझ्न सकेको छैन तर हामी उदासी र हताससामु झुक्यौँ भने उनीहरू त्यही चाहन्छन् । हामीलाई यस्तो गर्ने कुनै अधिकार छैन, हामी हाम्रा लडेका साथीहरूप्रति आभारी छौँ”, कारा–मुर्जाले भने । 

 रुस र बेलायतको दोहोरो नागरिकता भएका कारा–मुर्जालाई गत वर्ष २५ वर्षको कारागार सजाय सुनाइएको थियो । यो राष्ट्रपति भ्लादिमिर पुटिनको कारागारमा रहेका सबै आलोचकहरूको तुलनामा सबैभन्दा लामो ज्ञात सजाय हो । 

 कारा–मुर्जा अर्का विपक्षी राजनीतिज्ञ बोरिस नेमत्सोभका पनि निकट थिए । उनकाे सन् २०१५ मा क्रेमलिननजिकै हत्या गरिएको थियो । साथै गत साता नाभाल्नीको मृत्युले रुसमा कैदमा रहेका क्रेमलिनका आलोचकहरूका लागि भय उत्पन्न गराएको छ । 

 कारागारमा कारा–मुर्जाको स्वास्थ्य बिग्रिएको छ । उहाँका वकिलहरूका अनुसार दुई पटक विष दिइएकाले उनी गम्भीर स्वास्थ्य समस्याले पीडित छन् । यद्यपि साइबेरियाको कारागारबाट कारा–मुर्जाले ‘रुसलाई सामान्य, स्वतन्त्र युरोपेली लोकतान्त्रिक मुलुक बनाउने’ आशा व्यक्त गरे । “एलेक्सीले भनेका छन्, हार नमान्नुहोस्, हार मान्नु असम्भव छ”, उनले भने ।  रासस