रौतहटमा जग्गा विवाद हुँदा एक जनाको मृत्यु

सांकेतिक तस्बिर

रौतहट- रौतहटको पूर्वी भेग दुर्गा भगवती गाउँपालिकास्थित जग्गाको बिषय लिएर भएको दुई पक्षिय विवादमा एक जनाको मृत्यु भएको छ भने एक जना पक्राउ परेका छन् ।

दुर्गा भगवती-२ भलोहियास्थित भएको दुईपक्षीय विवादमा स्थानिय वर्ष ४० का जयप्रकाश दासको मृत्यु भएको प्रहरीले जनाएको छ ।

दुर्गा भगवती- २ भलोहिया हाल पिपरा सिमानामा बस्दै गरेका ४० वर्षीय जयप्रकाश दास र सोही स्थानका ५० वर्षीय चन्देश्वर महतोबीच शुक्रबार अपरान्ह विवाद हुँदा महतोले दासलाई धकेल्दा उनी भुइँमा लडेका थिए । लडेर अचेत भएका जयप्रकाश गाउँमा सामान्य उपचारपछि थप उपचारका लागि प्रादेशिक अस्पताल गौरमा लैजाँदा डाक्टरले मृत घोषणा गरेको प्रहरीले जनाएको छ ।

हत्यामा संलग्न एक जना मानिस पक्राउ गरिएको तथा घटनाबारे थप अनुसन्धान भइरहेको रौतहट प्रहरी प्रमुख एसपी महेन्द्र कुमार श्रेष्ठले जानकारी दिएका छन् ।

मृतकको शव पोष्टमार्टमका लागि प्रादेशिक अस्पताल गौरमा राखिएको जिल्ला प्रहरी कार्यालय रौतहटले जनाएको छ । घटनास्थल सदरमुकाम गौरदेखि झण्डै १५ किलोमिटर उत्तर पूर्वमा पर्छ।