प्राधिकरणले बनाएको विद्युतीय चार्जिङ स्टेशनले बढायो दुर्गन्ध [तस्बिरसहित]
गाडी चार्ज हुन घन्टौँ समय लाग्ने, हैरानी खेप्दै यात्रु

काठमाडौँ- नेपाल विद्युत् प्राधिकरणले ५१ स्थानमा विद्युतीय सवारी साधन चार्जिङ स्टेशन सञ्चालन गरिरहेको छ । विद्युतीय सवारी चार्जिङ पूर्वाधार विकास आयोजनाअन्तर्गत अहिले सात प्रदेशका मुख्य राजमार्ग, बसपार्क र ठूला सहरहरूका ५१ स्थानमा विद्युतीय सवारी साधन छिट्टो चार्ज गर्न मिल्ने चार्जिङ स्टेशन निर्माण भइरहेको हो ।
त्यसमध्ये २६ वटा ठूला बस, माइक्रो, ट्रक, पिकअप तथा कार र २५ वटा साना तथा ठूला कारहरू चार्ज गर्न मिल्ने प्राधिकरणले जनाएको छ । सोही क्रममा मकवानपुरको हेटौंडास्थित रातामाटेमा दुइटा चार्जिङ सेन्टर निर्माण भएको छ । यही बाटो प्रयोग गर्ने लामो तथा छोटो दूरीका विद्युतीय सवारी साधनहरूले यहाँको चार्जिङ स्टेशनमा चार्ज गर्छन् । सवारी चार्ज भइरहेका बेला लाग्ने समयका कारण यात्रुहरूलाई हैरानीको सामना गर्नु परेको यात्रुहरूले बताएका छन् ।
'हामी यही बाटो काठमाडौँ आउँछौं । छिटो पुगिन्छ भनेर घरबाट हिँड्छौं तर यही लाग्छ पौने एक घन्टा जति,' गाडी चार्ज हुँदा बखत लाग्ने समयमा हैरानी खेपिरहेका यात्रु टंक खत्रीले दुखेसो पाखे ।
टंक जस्तै अर्का यात्रु सुनिता खत्री पनि लामो समय कुर्नु पर्दा तनाव हुने गरेको बताउँछिन् । पेसाले सिलाई कटाई गर्ने उनी उता नपाएका लुगाफाटाहरू लिन काठमाडौँको असन पुग्छिन् । काठमाडौँसम्म आउनका लागि सुनिताले यही बाटो प्रयोग गर्छिन् । 'पहिले पेट्रोलियम पदार्थले चल्ने गाडीमा हिँड्थेँ तर अहिले विद्युतीय सवारीमा हिँड्छु,' उनले भनिन्, 'यो गाडीमा हिँड्न त आरामै छ तर चार्ज गर्दा धेरै समय लाग्छ । समय त्यसै खेर गएको देखेर वाक्कै लाग्छ । ६/७ घन्टाको बाटोमा ३/४ घन्टा त गाडीलाई चार्ज हुँदासम्म कुर्नुपर्छ ।'
६/७ घन्टाको बाटोमा ३/४ घन्टा त गाडीलाई चार्ज गर्न मात्र लाग्छ । समय धेरै त लाग्छ नै यसो गाडीबाट ओर्लेर छेउछाउको वातावरण हेरौँ भन्दा पनि नाक थुन्ने अवस्था छ । प्राधिकरणले चार्जिङ स्टेशन त बनायो तर यसको वरपरको वातावरणलाई दूषित तुल्यायो । जंगलको बीचमा बनेको यो चार्जिङ स्टेशन नजिकका वन जंगलमा प्लाष्टिक, कागज, पानीका बोतलहरू छरपस्ट फालिएका छन् ।
यहाँको चार्जिङ स्टेशनको अवस्था देख्दा प्राधिकरण तथा सरोकारवाला निकायले काठमाडौँ उपत्यका बाहिरका चार्जिङ स्टेशन दीर्घकालीन चलाउन खासै चासो दिएको देखिँदैन । उपत्यका बाहिरका अधिकांश चार्जिङ स्टेशनसम्म पुग्ने यात्रुहरूले सास्ती नै पाएका छन् । रातामाटेमा निर्माण भएको चार्जिङ स्टेशनका कारण वातावरण झनै दूषित हुन पुगेको यात्रुहरूको भनाइ छ ।
भक्तपुरको बालकोट बस्ने बबिता बस्नेत आफ्ना साथीभाइहरूसँग हेटौंडा घुम्न पुग्छिन् । उनी र उनका साथीहरूले जाँदा/आउँदा विद्युतीय गाडी नै चढे । वन जंगलको रमणीय दृष्य हेर्दै आएका उनीहरू चार्जिङ स्टेशनसम्म पुग्दा खपिनसक्नु गन्धले थलीए । गाडी चार्ज हुँदै गर्दा शौच जान भनेर हिँडेकी बबिता शौचालयको दयनीय अवस्था देखेर शौच नै नगरी गाडीमै बसिन् । 'गाडी चार्ज हुँदासम्म बाहिर निस्किम् भनेर निस्किएँ । सहनै नसक्ने गरी दुर्गन्ध आएर झण्डै मरिनँ म,' उनले सुनाइन् ।
चार्जिङ स्टेशन नजिक प्लास्टिकले घेरा हालेर महिला र पुरुषका लागि भनेर शौचालय बनाइएको छ । तर, शौचालयभित्र त के त्यसको नजिक पनि जान सक्ने अवस्था छैन । जसका कारण यात्रुहरू शौच गर्न बाहिर जंगलमा जाने क्रम बढेको छ । जसबाट प्राकृतिक सौन्दर्यतामा समेत ह्रास आएको छ ।
प्राधिकरणले चार्जिङ स्टेशन त बनायो तर यस वरिपरि रहेका पसल व्यवसाय र शौचालयको उचित व्यवस्थापन भने गर्न सकेन । अझ भन्ने हो भने चार्ज गर्न आउने गाडी बस्ने लाइनको पनि ठेगान छैन । गाडीका चालकहरूले मनपर्दी रूपमा गाडीहरू रोक्ने गरेका यहाँ आउने जोकोहीले पनि देख्न सक्छन् ।
यसरी मनलाग्दी गाडीहरू सडकमै रोक्नाले सवारी दुर्घटनाको पनि उच्च जोखिम रहेको छ । प्राधिकरणले चार्जिङ स्टेशन मात्र बनाएर यात्रुहरूले पाइरहेको सास्तीबारे अनभिज्ञ बनिरहेको जस्तो देखिन्छ । प्राधिकरणले विद्युतीय सवारी साधनको चार्जिङ स्टेशनको मापदण्ड पालना नगरेर झारो टार्ने काम गरिरहेको यात्रु खत्रीले बताए । यस्तै चार्जिङ स्टेशन नजिक राखिएका पसलमा गुणस्तर नभएका खानेकुराहरू बिक्री भइरहेको उनले बताए । 'भोक लागेर केही खाम् न भनेर गाको खानेकुराबाट गन्ध आए जस्तो लागेर त्यसै फर्किएँ,' उनले भने ।
सरकारले २०३० सम्ममा पेट्रोलियमबाट चल्ने सवारीलाई विद्युतीय सवारीले विस्थापन गर्ने नीति अघि सारेको छ । त्यस्तै सन् २०२५ सम्ममा निजी विद्युतीय सवारी साधनको व्यापार २५ प्रतिशत र सार्वजनिक सवारी साधनको व्यापार २० प्रतिशत पुर्याउने लक्ष्य लिएको छ । तर, अन्तर मन्त्रालय समन्वय हुन नसक्ने एवं विद्युतीय सवारीका लागि भरपर्दो पूर्वाधार विकास हुन नसक्दा सरकारी लक्ष्य प्रभावविहीन देखिएको छ । साथै चार्जिङ स्टेशन वरपरका स्थानहरूमा सरसफाइ गर्ने र वातावरणको सौन्दर्यता बढाउने कुनै पनि योजना प्राधिकरणसँग छ जस्तो देखिँदैन ।
यस्तै चार्जिङ स्टेशनमा यात्रुहरूको सुरक्षा पनि चुनौतीको विषय बनेको छ । यात्रुहरूले भोगेका सास्तीको जिम्मेवारी को ? भन्ने प्रश्नको जवाफ खोज्ने बेला आएको छ । प्राधिकरणले चार्जिङ स्टेशन बनाएर मात्र पन्छिन नमिल्ने यात्रुहरू बताउँछन् । प्राधिकरणले चार्जिङ स्टेशन र त्यस वरपर रहेका पसल र शौचालयतिर पनि अनुगमन तथा निगरानी गर्नु आवश्यक छ । पूर्वाधार बनाएर मात्र विकासको काम भएको मानिँदैन जबसम्म त्यसलाई उपयोग गर्ने प्रयोगकर्ता तथा सेवाग्राहीलाई सहज र सुरक्षित महसुस हुँदैन ।

गेरु वस्त्रधारीले उँटलाई भारी बोकाएर माग्दै मोरङ्गका गाउँ-गाउँमा

हुन्डी कारोबारमा संलग्न रहेको आरोपमा करिब २१ रुपैयाँसहित चिनियाँ नागरिक प…

महोत्तरीको चुरे क्षेत्रमा वायुप्रदूषण भयावह बन्दै

ताला फुटाएर काठमाडौँ महानगरका प्रमुख कार्यकारी अधिकृत गुरागाईं कार्यकक्ष प्रव…

कार्यकक्ष प्रवेश गर्न पाएनन् काठमाडौँ महानगरका प्रमुख प्रशासकीय अधिृकत गुरागाईं…

लामखुट्टेले हैरान पार्यो ? यी घरेलु उपायले भगाउनुस्

कन्याको आफन्तको सहयोगले महत्वपूर्ण काम हुने, मिथुनको व्यापारमा प्रशस्त फाइदा हु…

प्रतिक्रिया