अब अर्को कुनै सरकार बनाउने प्रयास हुँदैन : योगेश भट्टराई

फाइल फोटो

काठमाडौँ - नेकपा एमालेका नेता योगेश भट्टराईले अब अर्को कुनै सरकार बनाउने प्रयास नहुने बताएका छन् । 

बुधबार संसद भवन नयाँ बानेश्वरमा सञ्चारकर्मीसंग कुरा गर्दै भट्टराईले संसदको वर्तमान कार्यकाल रहेसम्म अहिलेको सरकार कायम रहने भन्दै अर्को कुनै सरकार बनाउने प्रयास नहुने बताएका हुन् । 

वर्तमान सरकारको निर्णायक शक्तिको रुपमा रहेको एमालेले प्रधानमन्त्रीलाई समर्थन गरेको भन्दै उनले सरकारलाई आउने चार वर्षसम्म सहज रुपमा चल्न दिने दायित्व एमालेको भएको धारणा राखे । 

उनले वर्तमान सरकारले नै मुलुकमा देखिएको समस्याहरू हल गर्ने दावी गरे । भट्टराईले अहिले नै गठबन्धनभित्र आलोपालो प्रधानमन्त्रीको कुरा नभएको र एमालेले प्रधानमन्त्री पाउनका लागि कुनै दावी समेत नगरेको जिकिर गरे । १५–१५ महिना प्रधानमन्त्री पदको बाँडफाँट गर्ने सहमति पनि नभएको उनको भनाइ छ । 

उनले धेरै कुरामा त्याग गरेर नयाँ समीकरण बनेको भन्दै पद भन्दा पनि समीकरणलाई बलियो बनाउन ध्यान केन्द्रित गर्ने बताए ।