कृतिलाई फिल्म गर्न भ्याइनभ्याइ

मुम्बई : कृति सेननले कुनै पनि फिल्मबाट उत्पात चर्चा पाएकी छैनन् तर रिलिज भएका फिल्मबाट दर्शकलाई निराश पनि पारेकी छैनन् । यही कारण हुन सक्छ कृतिलाई फिल्मको कुनै खाँचो छैन । जि न्युजका अनुसार कृतिले एक पछि अर्को फिल्मबाट अफर पाइरहेकी छिन् । कृति नजिक स्रोतका अनुसार कृति अहिले ७ वटा फिल्मको स्क्रिप्ट पढिरहेकी छिन् । 

‘बरेली कि बर्फी’, ‘लुका छिपी’ र ‘हाउसफूल ४’को सफलतापछि कृतिलाई पनि बलिउडमा ‘ब्यांकेबल’ अभिनेत्री मानिन थालेको छ । ‘पानीपत’ र ‘राब्ता’लाई छाडेर उनी अभिनित फिल्मले बक्स अफिसमा राम्रै कमाइ गरिरहेका छन् । यही कारण पनि निर्माता÷निर्देशक कृतिलाई फिल्ममा लिन इच्छुक हुन थालेका छन् । फलस्वरुप अर्को वर्ष कृतिका ५ फिल्म बजारमा आउने चर्चा छ । 

कृति अहिले चण्डीगढमा नयाँ फिल्मको सुटिङ गरिरहेकी छिन् भने यसको सुटिङ सके लगत्तै ‘मिमी’ शीर्षकको फिल्ममा देखिनेछिन् । यही बीचमा कृति अक्षयकुमारको अपोजिटमा ‘बच्चन पाण्डेय’मा पनि देखिनेछिन् । यसैगरी, कृति दिनेश भिजनले निर्माण गर्न लागेको अनटाइटल प्रोजेक्टका लागि पनि अनुबन्धित भएकी छिन् ।