राष्ट्रिय भलिबलमा न्यू डायमन्ड र एपीएफ विजयी सुरुआत

काठमाडौँ- डिफेन्डिङ च्याम्पियन न्यू डायमण्ड र एपीएफ क्लबले सातौं केएनपी नेरोलेक शेरबहादुर खड्का स्मृति राष्ट्रिय महिला भलिबल प्रतियोगितामा बुधबार विजयी सुरुआत गरेका छन् ।

त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा भएको पहिलो खेलमा न्यू डायमण्डले नेपाल आर्मीलाई २५–१२, २५–१५, १७–२५ र २५–२१ को सेटमा पराजित गर्यो । न्यू डायमण्डकी सुमित्रा रेग्मी ‘प्लेयर अफ दि म्याच’ घोषित भइन् ।

शेरबहादुर स्मृति प्रतिष्ठानद्वारा आयोजित प्रतियोगिताको दोस्रो खेलमा एपीएफले नेपाल प्रहरी क्लबलाई २५–२१, २२–२५, २५–१७ र २५–१६ को सेटमा हरायो । एपीएफकी सरस्वती चौधरी ‘प्लेयर अफ दि म्याच’ बनिन् । विजेता दुवै टोलीले समान ३–३ अंक जोडेका छन् ।

प्रतियोगिताको राखेपका सदस्य–सचिव टंकलाल घिसिङले एक कार्यक्रमबीच उद्घाटन गरे । केएनपी नेरोलेकको मुख्य प्रायोजनमा भइरहेको प्रतियोगिताको विजेताले चार लाख ९९ हजार र उपविजेताले दुई लाख ५० हजार नगद पुरस्कार जित्ने छन् । तेस्रो हुने टोलीले एक लाख २५ हजार तथा चौथोले ६२ हजार रुपैयाँ नगद पुरस्कार प्राप्त गर्ने छन् । प्रतियोगिताको सर्वोत्कृष्ट खेलाडीले ५० हजार, विधागततर्फ उत्कृष्ट हुनेले जनही २५ हजार र हरेक खेलको ‘प्लेयर अफ दि म्याच’ लाई १५ हजार रुपैयाँ नगदबाट पुरस्कृत प्रदान गरिने छ ।

शनिबारसम्म चल्ने प्रतियोगितामा ४ टिमले पहिले राउन्ड रोविन लिगका आधारमा प्रतिस्पर्धा गर्ने छन् । लिगको शीर्ष दुई स्थानमा रहने टोली उपाधिका लागि भिड्ने छन् । प्रतियोगिताअन्तर्गत बिहीबार पनि २ खेल हुनेछ । पहिलो खेलमा आर्मी र एपीएफ भिड्ने छन् । दोस्रो खेलमा प्रहरीले न्यू डायमण्डको सामना गर्ने छ ।