सुदूरपश्चिममा निलम्बित सासंदलाई दलको बैठकमा मात्रै रोक, सदनमा जान पाउने

धनगढी : सुदूरपश्चिममा ह्विप उल्लंघन गरिएको भन्दै निलम्बनमा परेका नेकपा एमालेका सात जना प्रदेशसभा सदस्यलाई दलको बैठकमा मात्रै रोक लगाइने भएको छ । उनीहरूले प्रदेशसभा बैठकमा भने जान पाउने भएका हुन् । एमाले प्रमुख सचेतक दुर्गाकुमारी विकले उनीहरूलाई दलको बैठकमा आउन नपाउने गरेर मात्र निलम्बन गरिएको जानकारी दिइन् । यसअघि संसदीय दलले ओली पक्षका सात जना सासंदलाई सम्पूर्ण जिम्मेवारीबाट निलम्बन गरिएको जनाएको थियो । 

एमाले संसदीय दलको सोमबार साँझ दलका नेता प्रकाशबहादुर शाहको अध्यक्षतामा बसेको बैठकले सात जना सदस्यहरूको भूमिका हेरेर सात दिन, १० दिन र १५ दिनसम्मका लागि निलम्बन गर्ने निर्णय गरेको थियो । निलम्बनमा पर्नेहरूमा पूर्वमन्त्री पठानसिंह बोहरा, रतन थापा, लिलाधर भट्ट, बलदेव रेग्मी, नेपालू चौधरी, ग्याल्बुसिंह बोहरा र माया तामाङ बोहरा रहेका रहेका छन् । बोहरा र थापालाई १५ दिन, भट्ट र रेग्मीलाई १० दिन र अरुलाई सात दिनका लागि दलको बैठकमा आउन नदिने गरेर निलम्बन गरिएको संसदीय दलले जनाएको छ ।