तरकारी र क्रेटको पनि कवाडीको नाममा कर असुल्दै ललितपुर महानगर [भिडियोसहित]

काठमाडौँ- ललितपुर महानगरपालिकाले तरकारी र तरकारी राख्‍ने क्रेटको कवाडी कर संकलन गरिरहेको पाइएको छ । ललितपुर महानगरको बल्खुमा रहेको कर संकलन केन्द्रबाट तरकारी र तरकारी पुर्‍याएर आएका क्रेटको कर लिएको हो । 

कवाडी निकासी कर संकलन गरिरहेको इन्द्रेणी हार्डवेयर तथा स्यानीटरीवेयरले तरकारी पुर्‍याएर फर्केकासँग कवाडी कर लिइरहेको तरकारी व्यापारीले गुनासो गरेका छन् । 

काठमाडौँ उपत्यकाका विभिन्न स्थानमा तरकारी पुर्‍याएर फर्केका क्रेटको कर लिएको एक व्यापारीले गुनासो गरे । 'तरकारी पुर्‍याएर आएको क्रेटलाई कवाडी मानेर कर मनलाग्दी लिएका छन्', ती व्यापारीले इकागजसँग भने, 'तरकारी दिनहुँ ठाउँ-ठाउँमा पुर्‍याउन जानुपर्छ कति कर तिर्ने ? क्रेट नै नहेरी सानो गाडीको पाँच सय र ठूलो गाडीको १ हजार लिएर अन्दाजी भन्दै कर असुल्छन् ।'

ललितपुर महानगरले एउटा क्रेट बापत २ रुपैयाँ र १३ प्रतिशत भ्याटसहित कर संकलन गरेको उनले जानकारी दिए । 

'एउटा क्रेटको दुई रुपैयाँको दरले ५ सय वटा क्रेटको १ हजार रुपैयाँ र त्यसमा १३ प्रतिशत भ्याट जोडेर १ हजार ३ सय ३० रुपैयाँ   तिरेको छु', उनले भने । 

'क्रेटलाई कवाडी देख्‍ने यो कस्तो राज्य हो', उनले आक्रोशित हुँदै प्रश्न गरे 'तरकारी पुर्‍याएर क्रेट लिएर फर्किँदा दिनहुँ कवाडी हुन्छ त ?' यस घटनाबारे बारम्बार ललितपुर महगरपालिकामा खबर गरेको उनले जानकारी दिए ।  'पैसा तिर्न पर्दैन मात्रै भन्नुहुन्छ तर यहाँ कर लिन भने छाड्दैनन्', उनले गुनासो गरे ।

ललितपुर महानगरपालिकाले जनगुनासो आएकाले अबबाट क्रेटको कवाडी कर नलिने बताएको थियो । महानगरका सूचना अधिकारी राजु महर्जनले कर नलिन पत्र पठाउने तयारी रहेको बताएका थिए । महर्जनले धेरै जनगुनासो आएको बताए । एक महिनाअघि नै महर्जनले छिट्टै पत्र काटेर कर नलिने बताए पनि अझै कार्यान्वयन आएको छैन ।