सरकारको सेयर स्वामित्व भएका संस्था एकीकरण, बचत तथा ऋणका सहकारी मर्ज गरिने

काठमाडौँ- सरकारले आगामी आर्थिक वर्षमा सरकारको शेयर स्वामित्व भएका सहकारी संस्थालाई एकीकरण गर्ने भएको छ । आगामी आर्थिक वर्ष २०८१/८२ को नीति तथा कार्यक्रम सार्वजनिक गर्दै राष्ट्रपति रामचन्द्र पौडेलले आगामी वर्ष बचत तथा ऋणका सहकारी मर्ज गर्ने नीति लिने बताएका हुन् ।

राष्ट्रपति पौडेलले बजेट विनियोजन प्रणालीमा सुधार गरिने पनि बताएका छन् । संघीय संसदको संयुक्त बैठकमा सरकारले तयार गरेको नीति तथा कार्यक्रम प्रस्तुत गर्दै राष्ट्रपति पौडेलले बजेट निर्माणमा देखिएका समस्या क्रमश: समाधान गर्दै जाने बताए ।

नीति तथा कार्यक्रम मार्फत सरकारले राजस्वका नयाँ स्रोत खोजी गर्ने तथा करदाताको कर चुक्ता गर्न लाग्ने लागत घटाउने घोषणा गरेको हो ।

नीति तथा कार्यक्रममा विनियोजन कुशलता कायम गर्ने घोषणा गरिए पनि व्यवहारमा सरकारले पूर्वतयारी नभएका, खुद्रे प्रकृतिका परियोजनामा बजेट विनियोजन गरिरहेको छ ।

अन्धाधुन्ध आन्तरिक ऋण लिँदै उत्पादन नबढ्ने क्षेत्रमा खर्च गरिरहेको सरकारले नीति तथा कार्यक्रम मार्फत् आन्तरिक ऋणलाई उत्पादन बढाउने क्षेत्रमा मात्रै खर्च गर्ने गर्ने घोषणा गरेको हो ।