एपीएफ फाइनलमा पुग्दा कोशीमाथि बागमतीको जित

काठमाडौँ- नेपाल एपीएफ क्लबले ललितपुर मेयर्स कप महिला क्रिकेट प्रतियोगिताको फाइनलमा स्थान सुरक्षित गरेको छ ।

कीर्तिपुरस्थित त्रिवि क्रिकेट मैदानमा बुधबार भएको खेलमा आयोजक ललितपुर मेयर्स-११ लाई ८ विकेटले पराजित गर्दै एक खेलअगावै एपीएफले फाइनलमा स्थान सुरक्षित गरेको हो । एपीएफको यो लगातार तेस्रो जित हो ।

जितका लागि ७२ रनको लक्ष्य एपीएफले ९ ओभर २ बलमा केवल २ विकेट गुमाएर पूरा गर्‍यो । एपीएफका लागि कप्तान सिता राना मगरले ५० रनको योगदान गरिन् । ललितपुर मेयर्स-११ का लागि कृतिका मरासिनीले २ विकेट हात पारिन् ।

यसअघि टस जितेर पहिले ब्याटिङ गरेको ललितपुर मेयर्स-११ ले निर्धारित २० ओभरमा ५ विकेट गुमाएर ७१ रन बनाउँदा कप्तान पुजा महतोले २४ तथा ज्योत्सनिका मरासिनीले २१ रन जोडे ।

बुधबार नै भएको अर्को खेलमा बागमती प्रदेशले कोशी प्रदेशलाई ८ विकेटले हरायो । वर्षाका कारण प्रभावित खेलमा ६४ रनको लक्ष्य बागमतीले ११ ओभर २ बलमा २ विकेट गुमाएर पूरा गर्‍यो ।

त्यसअघि कोशीले तय गरिएको १३ ओभरमा ६ विकेटको क्षतिमा ६३ रन जोडेको थियो ।