संसदमा कांग्रेसले गरेको प्रदर्शनको मूल्य चर्को पर्ने प्रधानमन्त्री दाहालको चेतावनी

फाइल तस्बिर

काठमाडौँ -  प्रधानमन्त्री पुष्पकमल दाहाल प्रचण्डले संसदमा नेपाली कांग्रेसले गरेको प्रदर्शनको मूल्य चर्को पर्ने चेतावनी दिएका छन् । प्रतिनिधिसभामा नाराबाजीका बीच विश्वासको मत लिने क्रममा बोल्दै प्रधानमन्त्रीले कांग्रेसले संसदमा इतिहासमै कलंकित हुने काम गरेको भन्दै यो मूल्य चर्को पर्ने चेतावनी दिएका हुन् ।

उनले भने- तपाईहरुले बहुत गलत गर्नुभयो भन्ने मलाई लागेको छ । नेपालको इतिहासमा जुन प्रधानमन्त्रीले पटक पटक तपाईहरुलाई साथ दियो, त्यो प्रधानमन्त्रीलाई संविधान अनुसार विश्वासको मत दिन नदिएर तपाइहरुले नराम्रो उदाहरण प्रस्तुत गर्नुभयो । आजको तपाईहरुको यो गतिविधि राम्रोसँग कलंकको रुपमा स्थापित हुने छ ।'

उनले पटक पटक कांग्रेसलाई सहयोग गरेको स्मरण गर्दै आजको व्यवहारले आफूलाई निकै दुखी तुल्याएको बताए । उनले आफूलाई विश्वासको मत दिन लागेको नेकपा एमाले लगायत सम्पूर्ण सत्ताधारी दलहरुलाई धन्यवाद दिए ।