दाङमा मोही किसान र प्रहरीबीच झडप

काठमाडौँ- दाङमा रहेका स्वर्गद्वारी गुठी पीडित मोही किसानहरूले घोराहीमा रहेको मालपोत तथा नापी कार्यालयमा तालाबन्दी गरेका छन् ।

आफूहरूका माग सरकारले पटक-पटक सम्झौता गरे पनि कार्यान्वयन नगरेको भन्दै तालाबन्दी गरेको मोही किसानहरूले जनाएका छन् । तालाबन्दीका क्रममा प्रहरी र आन्दोलनकारीबीच झडप भएको छ ।

प्रहरीको लाठी चार्ज र अश्रु ग्यास प्रहारबाट ५ जना घाइते भएका छन् । उनीहरूको राप्ती स्वास्थ्य विज्ञान प्रतिष्ठानमा उपचार भइरहेको छ ।

गुठी जग्गालाई रैकर गर्नु पर्ने, जग्गामा रहेको दोहोरो स्वामित्व अन्त गर्नुपर्ने लगायतका माग राख्दै गत फागुन ८ गतेदेखि गुठी पीडित किसानहरूले एक महिनासम्म दाङमा शान्तिपूर्ण आन्दोलन गरेका थिए । त्यसपछि सरकारले मोही किसानका समस्या समाधान गर्ने भन्दै वार्ता समिति गठन गरी सहमति गरेको थियो । तर, सहमति कार्यान्वयन हुन नसकेको मोही किसानहरूको गुनासो छ ।