टी-२० विश्वकपः आयरल्यान्डलाई पराजित गरे अमेरिका सुपर ८ मा पुग्ने

काठमाडौँ- अमेरिका र वेस्ट इन्डिजमा जारी आईसीसी पुरुष टी-ट्वान्टी क्रिकेट विश्वकपअन्तर्गत अमेरिकाले आज राति आयरल्यान्डको सामना गर्दैछ ।

समूह 'ए' मा रहेका सह-आयोजक अमेरिका र आयरल्यान्डबीचको खेल अमेरिकामा नेपाली समयअनुसार राति ८:१५ बजेबाट सुरु हुने तालिका रहेको छ ।

आज रातिको खेलमा आयरल्यान्डलाई पराजित गरेको खण्डमा अमेरिका सुपर ८ मा पुग्नेछ । अहिलेको अवस्थामा अमेरिकाले ३ मध्ये २ खेलमा जित हात पार्दै ४ अंक जोडेको छ ।

यस समूहबाट लगातार ३ खेल जित्दै भारत अघिल्लो चरणमा पुगिसकेको छ ।

समान ३-३ खेल खेलेका पाकिस्तान र क्यानाडाको समान २-२ अंक भएपनि नेट रनरेटमा पाकिस्तान माथि छ ।

अर्कोतर्फ आयरल्यान्डले खेलेका दुवै खेलमा पराजय भोगिसकेको छ । त्यसैले अघिल्लो चरणको यात्रा तय गर्न आयरल्यान्डले ठूलो अन्तरको जित निकाल्नुपर्ने हुन्छ ।