काठमाडौँ महानगरमा २ हजार ८५९ जना विद्यार्थीले पाए छात्रवृत्ति

काठमाडौँ- काठमाडौँ महानगरले कक्षा ११ को छात्रवृत्तिका लागि २ हजार ८५९ जना विद्यार्थीको नाम सार्वजनिक गरेको छ ।

काठमाडौँ महानगरपालिकाको छात्रवृत्ति छनोट समितिको निर्णयअनुसार शनिबार २ हजार ८५९ जना विद्यार्थीको नाम सार्वजनिक गरेको हो ।

यसको विवरण इमेलबाट विद्यालयहरूलाई पठाइ सकिएको महानगरले जनाएको छ । यस्तै विद्यार्थीहरूलाई एसएमएस पठाइएको महानगरले भनेको छ । विद्यार्थीहरूले प्रवेश पत्र प्राप्त गरेकै विधिबाट आफ्नो सिफारिस सम्बन्धी जानकारी पाउन सक्नेछन् ।

साउन ४ गते लिइएको परीक्षाको नतिजामा विषयगत र समूहगत योग्यता क्रम, परीक्षार्थीले अनलाइन आवेदन फाराम भर्दा शिक्षण संस्थाहरूमा गरेको प्राथमिकता क्रमअनुसार आरक्षण र समूहगत रूपमा छुट्याइएको सिट संख्याका आधारमा सूची प्रकाशन गरिएको महानगरले जनाएको छ ।

नाम प्रकाशन भएका विद्यार्थीले साउन १५ गतेभित्र भर्ना गर्न महानगरले आग्रह गरेको छ । छात्रवृत्ति प्राप्त गर्ने विद्यार्थीहरूले कुनै पनि शुल्क तिर्नु पर्दैन ।

छात्रवृत्ति छनोट समितिका संयोजक एवं शिक्षा अधिकारी गोविन्दप्रसाद शर्मा भन्छन्, ‘कतिपय विद्यालयहरूले भर्ना, प्रयोगशाला शुल्क माग गरेको गुनासो आएको छ । हामी यस विषयमा जानकारी लिँदैछौँ ।’

विभागले विद्यालयले शुल्क माग गरेकोसहित भर्नामा कुनै समस्या भए तत्काल सम्पर्क गर्न कार्यालय र शिक्षा अधिकृतहरूको नम्बर उपलब्ध गराएको छ ।