पावर ग्रीड स्तरोन्नतिका लागि एडीबीको १५.६० करोड डलर ऋण

काठमाडौं: एसियाली विकास बैंक (एडीबी)ले नेपालमा पावर ग्रीड स्तरोन्नतिका लागि १५ करोड ६० लाख अमेरिकी डलर ऋण सहयोग स्वीकृत गरेको छ ।  
नेपालमा अधिकांश जनताले ग्रीडको विद्युत् उपभोग गरिरहेको भए पनि बढ्दो विद्युतको मागलाई लक्षित गरी आपूर्ति सञ्जाल विस्तार, विद्युत् आपूर्तिको नियमितता, विश्वसनीयता र गुणस्तरीयता वृद्धि गर्नका लागि यो ऋण सहयोग परिचालन गरिने बताइएको छ । विश्वसनीय र गुणस्तरीय आपूर्तिले आगामी दिनमा विद्युत चुहावटमा गिरावट ल्याउन मद्दत पुग्ने एडीबीले जनाएको छ । 
‘विद्युत् ग्रीड आधुनिकीकरण परियोजनाले देशभर ग्रीड सबस्टेशनहरुमा स्वचालित पद्धति विकास गर्ने, विभिन्न क्षेत्रमा वितरण र प्रसारण प्रणाली आधुनिकीकरण गर्ने, काठमाडौं उपत्यकामा स्मार्ट मिटर जडान गर्ने र विद्युत् प्राधिकरणको संस्थागत सुदृढीकरण तथा सुधारमा सहयोग पुग्नेछ,’ एडीबीद्वारा जारी विज्ञप्तिमा उल्लेख छ । 
एडीबीका प्रमुख उर्जा विशेषज्ञ जीवन आचार्यले नेपालमा उर्जा क्षेत्रका मुख्य नीतिहरु र संस्थागत सुधारमा एडीबीले सक्रिय भूमिका निर्वाह गरेको उल्लेख गर्दै यो परियोजनाले विश्वसनीय र प्रभावकारी विद्युत् आपूर्तिको निरन्तरतामा मद्दत पुग्ने बताए । यसका अतिरिक्त यो परियोजना नेपालमा महामारीपश्चात्को आर्थिक पुर्नस्थापनामा केन्द्रित हुने उनको भनाइ छ ।  
यस परियोजनाले ३४ सबस्टेशनहरुमा स्वचालित पद्धतिको विकास, २२० केभी र १३२ केभी को स्वचालित ग्रीड सबस्टेशन निर्माण, ११२ किमी नयाँ प्रसारण लाइन निर्माण १४४ किमी प्रसारण लाइनको कुशल कन्डक्टर (तार) जडानमार्फत् स्तरोन्नति र काठमाडौं उपत्यकामा तीन लाख ५० हजार स्मार्ट मिटर जडान गर्नेछ । काठमाडौंमा विद्युत् वितरण निर्देशन तथा नियन्त्रण केन्द्रको पनि स्थापना गरिने एडीबीले जनाएको छ ।
यसका अतिरिक्त विद्युत्को उपयोगमा दक्षता र सुरक्षा ल्याउनुका साथै महिला र विपन्न वर्गको सहभागिता वृद्धिलाई प्राथमिकता दिइने उल्लेख छ । यो परियोजनाअन्तर्गत विद्युत् प्राधिकरणको क्षमता विकास, विस्तृत कर्पोरेट विकास योजना, ग्रीड सबस्टेशन स्वचालित प्रणाली व्यवस्थापनका लागि कर्मचारी तालिम तथा सशक्तिकरण र वित्तीय प्रतिवेदन प्रणाली र वित्तीय स्थायित्वका लागि काम गरिनेछ ।