कटहरियामा शिक्षिका तथा कर्मचारी धर्नामा, ५ गतेदेखि विद्यालय बन्दको घोषणा

रौतहट- रौतहटको कटहरियास्थित तलब भत्ताको माग गर्दै शिक्षिका तथा विद्यालय कर्मचारी धर्नामा बसेका छन् । आगामी ४ गते मंगलबारसम्म तलब भत्ता नपाएमा ५ गते बुधबारदेखि नगरको सम्पूर्ण सामुदायिक विद्यालय बन्द गर्ने घोषणा गरेका छन् ।

नेपाल विद्यालय कर्मचारी तथा बाल विकास शिक्षक युनियन नगर कार्यसमितिको आयोजनामा शिक्षिका तथा विद्यालय कर्मचारी नगरपालिका प्राङ्गणभित्र आइतबार धर्नामा बसेका हुन् ।

नगरभित्रका सामुदायिक विद्यालयहरूमा कार्यरत सम्पूर्ण विद्यालय कर्मचारीहरू, बाल विकास सहयोगी कार्यकर्ताले तलब र भत्ताको माग गर्दै आन्दोलनको कार्यक्रम घोषणा गरेका हुन् ।

सामुदायिक विद्यालयमा कार्यरत विद्यालय कर्मचारी र बाल विकास सहयोगी कार्यकर्ताले आर्थिक वर्ष २०७९/०८० को वैशाखदेखि असार मसान्तसम्मको न्यूनतम थप तलब, यस आर्थिक वर्षको वैशाखदेखि हालसम्मको तलब र प्रतिमहिना दुई हजारको दरले प्रोत्साहन भत्ता समेतको रकम निकासा नभएर कसैले पनि न पाएर कठिनाइ भएको छ ।

सम्पूर्ण विद्यालय कर्मचारी र सहयोगी कार्यकर्ताले आगामी ५ गते मंगलबारसम्म तलब भत्ता निकासा नभएमा निम्न अनुसारको आन्दोलन गर्न बाध्य हुने बताएका छन् ।

आजदेखि सुरु भएको धर्नालाई भोलि ३ गतेसम्म निरन्तरता दिने, भदौ ४ गते हातमा कालो पट्टी बाँधेर आआफ्नो विद्यालयमा काम काज गर्ने र भदौ ५ गतेदेखि कटहरिया नगर क्षेत्रका सम्पूर्ण सामुदायिक विद्यालयहरू अनिश्चितकालका लागि बन्द गरिने धर्नामा सहभागी एक जना शिक्षक देवीलाल कुशवाहाले बताएका छन् ।

कटहरियास्थित सम्पूर्ण सामुदायिक विद्यालयहरूमा विद्यालय कर्मचारी र बाल शिक्षा सहयोगी कार्यकर्ता गरी ६४ जना कार्यरत रहेका छन् ।

कटहरिया नगरपालिकाका मेयर अजय प्रकाश जैसवाल उपमेयर रिता देवी यादव सहित जनप्रतिनिधि कर्मचारी गरी ११ जना भ्रष्टाचार मुद्दामा अख्तियारद्वारा दोषी ठहर भएर झण्डै १ महिना अघि निलम्बित भएपछि बाल विकास शिक्षिका तथा विद्यालय कर्मचारी तलब सुविधा पाउनबाट वञ्चित भएका छन् । गत आर्थिक वर्षको अन्तिम महिना असारमा प्रमुख प्रशासकीय अधिकृत सुरेन्द्र प्रधानले चासो न लिएको कारण तलब सुविधा पाउन नसकेको उनीहरूको आरोप रहेको छ ।

करार तथा दैनिक ज्यालादारीको नाउँमा मेयर जैसवालले वार्षिक करोडौं रकम निकासा गराउँछन् । तर, दिनरात मिहिनेत गरेका विद्यालय कर्मचारी तथा बाल विकास शिक्षिकाको तलब भत्ता निकासा गराउन मेयर जैसवाल संगै नगर शिक्षा संयोजक अनिलकुमार निधिले समेत चासो न देखाएको पीडितहरूले गुनासो गरेका छन् ।