साफ यू-२० च्याम्पियनसिपमा आज नेपाल र बंगलादेशबीच खेल हुँदै

काठमाडौँ- काठमाडौँमा जारी साफ यू-२० च्याम्पियनसिप अन्तर्गत आज समुह 'ए' अन्तर्गत नेपाल र बंगलादेशबीच खेल हुँदै छ ।

सातदोबाटोस्थित एन्फा कम्प्लेक्समा हुने यो खेल दिउँसो ३ बजेदेखि शुरु हुने छ । नेपाल र बंगलादेश समुह 'ए'बाट सेमिफाइनलमा पुगिसकेका छन् ।

दुवैले आ-आफ्नो खेलमा श्रीलंकालाई पराजित गरेर सेमिफाइनलमा स्थान पक्का गरेका हुन् । आजको विजेताले समुह विजेता र उपविजेताको टुंगो लगाउने छ ।

त्यस्तै समुह 'बी'मा भने भारत र भुटानले एक एक खेल जितेका छन् । भारतले भुटानलाई र भुटानले माल्दिभ्सलाई पराजित गरेको छ । अब शुक्रबार हुने भारत र माल्दिभ्सबीचको खेलपछि समुह 'बी'बाट सेमिफाइनलमा पुग्ने देशको टुंगो लाग्ने भएको छ ।

नेपालसहित ६ देशले भाग लिएको यस प्रतियोगितामा नेपाल समुह 'ए'बंगलादेश र श्रीलंकासँग रहेको छ भने समुह 'बी'मा भारत, भुटान र माल्दिभ्स रहेका छन् ।