हिरासतमा रहेका पाकिस्तानी सांसदहरूलाई संसद्मा उपस्थित हुन अनुमति

काठमाडौँ - जेलमा रहनुभएका पूर्वप्रधानमन्त्री इमरान खानको समर्थनमा प्रदर्शन गरेपछि नयाँ विरोध कानुनअन्तर्गत हिरासतमा लिइएका धेरै पाकिस्तानी सांसदलाई बिहीबार संसद्मा उपस्थित हुन अनुमति दिइएको छ । 

यसै साता १० सांसदलाई पक्राउ गरिएको थियो । तीमध्ये केहीलाई राजधानी इस्लामावादमा नेसनल एसेम्बलीमा उनीहरूको कार्यालयबाट पक्राउ गरिएको थियो । उहाँहरूमाथि मङ्गलबार एक साता पुरानो विरोध कानून र आतंकवाद विरोधी ऐनअन्तर्गत आरोप लगाइएको थियो । 

उनीहरूलाई आठ दिनका लागि हिरासतमा पठाइएको थियो तर सभामुखले हिरासतमा फर्कनुअघि संसद् अधिवेशनमा उपस्थित हुन अनुमति दिइनुपर्ने आदेश दिएपछि बिहीबार धेरै सांसद संसद्मा उपस्थित भए । 

 “म सभामुखलाई प्रोडक्सन आदेशका लागि धन्यवाद दिन्छु”, बढ्दो राजनीतिक वातावरणलाई लिएर सांसद शेर अफजल खान मारवतले सदनमा भने, “विधानसभाको तल्लो तहमा घृणाले सिंगो मुलुकलाई असर गरिरहेको छ ।”

पूर्वप्रधानमन्त्री खानको पाकिस्तान तेहरिक–ए–इन्साफ (पिटिआई) पार्टीका हजारौँ समर्थक आइतबार राजधानी इस्लामाबादमा भेला भएको एक जुलुसलाई तितरबितर पार्न असफल भएपछि प्रहरीले अश्रु ग्यास प्रहार गर्नुपरेको थियो । 

अधिकारीहरूले जुलुसका लागि अनुमति दिएका थिए तर जुलुसलाई निर्धारित समयमा समाप्त गर्न आदेश दिएका थिए । साथै उनीहरूले खानको पिटिआई पार्टीका समर्थकहरूले सम्झौताका शर्तहरूको उल्लंघन गरे कानूनी कारवाही गरिने चेतावनी दिएका थिए ।

 सरकारले सार्वजनिक जमघटलाई नियमन गर्ने नयाँ कानून पारित गरेपछि यो पहिलो प्रदर्शन थियो । नयाँ कानुनका बारेमा अधिकार समूहहरूले विरोधलाई दबाउन कानून बनाइएको बताएका छन् । 

पूर्वक्रिकेट खेलाडी खान गत वर्ष अगस्टमा धेरै आरोपमा जेल गएपछि पार्टीले व्यापक आलोचनाको सामना गर्नुपरेको छ । खानले ती आरोप राजनीतिबाट प्रेरित भएको र आफूलाई सत्ताबाट टाढा राख्न डिजाइन गरिएको बताएका छन् ।