श्रीलंकामा सत्ता परिवर्तन: नवनिर्वाचित राष्ट्रपति दिसानायकेले संसद् विघटन गरी निर्वाचनको मिति तोके

काठमाडौँ - श्रीलंकाका नवनिर्वाचित राष्ट्रपति अनुरा कुमारा दिसानायकेले पद ग्रहण गरेलगत्तै संसद् विघटन गर्ने निर्णय गरेका छन्। श्रीलंकाली सञ्चारमाध्यमका अनुसार मंगलबार राति संसद् विघटन भएको हो।

नयाँ संसदीय चुनाव आगामी नोभेम्बर १४ मा हुने सरकारी राजपत्रमा उल्लेख गरिएको छ। यसैबीच, दिसानायकेले डा. हरिनी अमारासुरियालाई प्रधानमन्त्रीमा नियुक्त गरेका छन्, जसले देशमा नयाँ युगको सुरुवातको संकेत गरेको छ।

राष्ट्रपतिमा निर्वाचित भएको केही दिनमै दिसानायकेले विपक्षी नेता सजिथ प्रेमदासालाई पराजित गर्दै सत्ता सम्हालेका थिए । उनले आफ्नो चुनावी अभियानमा ‘परिवर्तनको उम्मेदवार’ को रूपमा श्रीलंकाली जनताको समर्थन बटुलेका थिए। श्रीलंकामा आर्थिक संकट र राष्ट्रव्यापी असन्तोषको पृष्ठभूमिमा दिसानायकेलाई नयाँ नेतृत्वका लागि सशक्त उम्मेदवारको रूपमा हेरिएको थियो।

राष्ट्रपतिका लागि दोस्रो चरणको मतगणनामा जित हासिल गरेका दिसानायकेले आगामी दिनहरूमा श्रीलंकाको राजनीतिक भविष्य कस्तो बनाउने हुन् भन्ने विषयमा राष्ट्रका नाममा बुधबार सम्बोधन गर्नेछन्।