निर्वाचनमा राजनीतिक विचार बोकेका पार्टीलाई निर्वाचित गर्न महासचिव पोखरेलको आह्वान

नेकपा (एमाले)का महासचिव शङ्कर पोखरेलले काठमाडौँमा हुने उपनिर्वाचनमा राजनीतिक बिचार बोकेका पार्टीलाई निर्वाचित गर्न आह्वान गरेका छन् ।

पछिल्लो समय केही क्षेत्रमा लोकप्रिय भएको मान्छे राजनीतिमा आउनुपर्छ भन्ने मान्यता स्थापित भएको र केही स्थानमा त्यस्तै व्यक्ति निर्वाचित भएकाले समाजमा सास्कृतिक मूल्य र मान्यताको विघटन तीव्र गतिमा भइरहेको उल्लेख गरेका छन् ।

संगठित संस्थाले मात्र राजनीतिलाई डोर्याउने भएकाले अब काठमाडौँमा हुने उपनिर्वाचनमा यस्तो कुरालाई ध्यान दिन मतदातालाई आह्वान गरेका छन् । शुक्रबार अखिल नेपाल महिला सङ्घ काठमाडौंले आयोजना गरेको “नारी सङ्कल्प“ विमोचन तथा शुभकामना आदान–प्रदान कार्यक्रममा उनले सामाजिक अराजकता विकास र समृद्धिको बाधक रहेको बताएका छन् ।

कसैको चर्को विरोधको कारण लोकप्रियता हासिल गरेर राजनीतिक क्षेत्रमा आउँदा अराजकता बढेको उनको भनाई छ ।

विचारको आधारमा होइन लोकप्रियताको आधारमा राजनीति त चल्छ भन्ने मान्यताले समस्याको समाधान नहुने भन्दै उनले राजनीतिले मात्र समाजको समस्या समाधान गर्ने बताए ।

महासचिव पोखरेलले राष्ट्रलाई अहिलेको चुनौती र संकट बाहिर निकाल्न सरकार प्राथमिकता रहेको बताउँदै पार्टीलाई निर्णायक शक्ति बनाउनका लागि पार्टीमा महिलाहरूको आवश्यकता रहेको धारणा राखे ।

कार्यक्रममा नेकपा एमालेका नेताहरुले लेखेका बिचार सहित महिलाहरूको रचना समेटिएको नारी संकल्प नामको पुस्तक विमोचन गरिएको थियो । अनेमसंघका अध्यक्ष टुका हमालको अध्यक्षतामा भएको कार्यक्रममा एमाले उपाध्यक्ष अष्टलक्ष्मी शाक्य, स्थायी कमिटी सदस्य बिन्द्रा पाण्डे लगायतका नेताहरूले पुस्तक विमोचन गरेका थिए ।

अनेमसंघ अध्यक्ष हमालले नारी सङ्कल्पको अध्ययनले राजनीतिमा चासो राख्नेहरूका लागि बिचार बनाउन आधार मिल्ने बताइन् । पुस्तकमा अध्यक्ष हमालले संविधानमा महिलाको हक प्रभावकारी कार्यान्वयन, नेपाली महिला आन्दोलनमा अनेमसंघ यसको उपलब्धि र भावी कार्यदिशा, विश्व महिला आन्दोलन र हाम्रो परिवेश, पार्टी र जनसंगठन बीचको सम्बन्ध लगायतका विषयमा एमालेका उपाध्यक्ष अष्टलक्ष्मी शाक्य, स्थायी कमिटी सदस्य विन्द्रा पाण्डे, भानुभक्त ढकाल, नेकपा एमाले महिला इन्चार्ज सीता पौडेल, लगायतले लेखेको जानकारी दिइन् ।