ठमेल पर्यटन परिषद् सुरक्षा गार्डको नाममा ‘सहकारी’ जस्तै पैसा उठाउँदै
'विधानले पैसा उठाउँ भन्दैन, आम्दानीको स्रोत खोजिनुपर्छ'

काठमाडौँ- केही दिनअघि ठमेल पर्यटन विकास परिषद्ले एउटा अनुरोध गर्यो । ठमेलका घरधनी तथा व्यवसायीलाई लक्षित गरी आर्थिक सहयोग उपलब्ध गराउन परिषद्ले अनुरोध गरेको थियो ।
'पर्यटकीय ठमेल क्षेत्रमा सुरक्षाकर्मी राखी व्यवस्थित गर्दै आएका छौ । उक्त कामलाई निरन्तरता दिन यहाँहरूको नैतिक, भौतिक र आर्थिक सहयोगको आवश्यकता भएको हुनाले ठमेल पर्यटन विकास परिषदबाट यहाँहरूको घर तथा व्यवसाय स्थलमा सहयोगको अपेक्षा सहित आर्थिक संकलन गर्न आउने जानकारी गराउँदछौ,’ अनुरोधमा उल्लेख थियो ।
परिषद्ले ठमेल क्षेत्रलाई सभ्य र सुरक्षित बनाउन भनेर गत साउन १५ देखि २० जना सुरक्षागार्ड राख्न सुरु गरेको थियो । अनैतिक क्रियाकलाप, विदेशी पर्यटकलाई देख्नसाथ पैसा माग्ने, पसल अगाडि खुला रुपमा सामग्री बिक्री गर्नेलाई प्रतिबन्ध गराउन सुरक्षा गार्ड परिचालित गरेको छ ।
अहिले दिनमा १२ र रातमा ८ जना सुरक्षाकर्मी परिचालन गरेर सुरक्षा गार्ड परिचालित छन् । ठमेलको विभिन्न १२ वटा नाकामा सुरक्षागार्ड परिचालन भएका छन् । परिषद्ले सुरक्षा गार्डका लागि भनेर ठमेलका व्यवसायी तथा घरपेटीसँग पैसा उठाउन थालेको छ । परिषद्ले पैसाको रसिद थमाएर पैसा उठाउन सुरु गरेपछि उनीहरूले गुनासो गरेका हुन् ।
साना, मध्यम तथा ठूला व्यवसायीको वर्गीकरण गरेर शूल्क लिन थालेको छ । तीन सय रुपैयाँदेखि पाँच सय रुपैयाँ उठाउने गरेको पाइएको छ । परिषद्को सस्तो लोकप्रियता तथा व्यवसायीलाई आर्थिक भार थोपरेको भन्दै उनीहरूले आपत्ति जनाएका छन् । यतिखेर सहकारीले जस्तै पासबुक बनाएर परिषद्ले पैसा उठाउन थालेको छ । पासबुक बोकेर परिषद्का प्रतिनिधि व्यवसायीका सामुन्ने पुग्ने गरेका छन् ।
अहिले महिनैपिच्छे परिषद्का प्रतिनिधि सुरक्षा गार्ड शुल्क संकलन गर्न आइरहेको एक व्यवसायीले बताए । एक दशकदेखि पर्यटकीय क्षेत्र ठमेलमा व्यवसाय गरिरहेका उनले पहिलो पटक सुरक्षाको नाममा पैसा बुझाउनु परेको गुनासो गरे ।
उनका अनुसार पसलमा आएर रसिद र पासबुक दिएका छन् । ‘हामीसँग तीन सय रुपैयाँ उठाएका छन्,’ उनले भने । ‘पर्यटकीय क्षेत्र सुरक्षित र आकर्षक हुनु राम्रो हो । सुरक्षाको नाममा पैसा संकलन गर्नु राम्रो होइन,’ उनले भने,’ मुख्य चोकदेखि भित्रपट्टि मेरो व्यवसाय छ । ठमेल परिषद्को सुरक्षा गार्डले मलाई के सुरक्षा दिन्छ ? उनीहरूले केही गर्न पाउने होइनन् ।‘
सुरक्षा गर्न भनेर पर्यटकीय क्षेत्र ठमेलमा महानगर प्रहरी र नेपाल प्रहरी रहेको उनको बुझाइ छ । यहाँका घरधनी र व्यवसायीले केही परेमा नेपाल प्रहरीलाई तुरुन्त फोन गर्ने गरेको उनले बताए ।
ठमेल पर्यटन विकास परिषद्का पूर्व अध्यक्ष भवीश्वर शर्माले संस्थागत रुपमा पैसा उठाउन नमिल्ने बताए । ठमेल पर्यटन परिषद भनेको ठूलो गरिमा बोकेको संस्था रहेकाले आम्दानीको स्रोत खोज गरेर आम्दानी बढाउनु पर्ने उनले सुझाव दिए ।
‘परिषद्को विधानले पनि पैसा उठाउन नमिल्ने व्यवस्था गरेको छ । यो कार्य विधान विपरीत रहेको छ,’ उनले भने,’ यस्ता कामहरू विवादित बन्न सक्ने भएकाले संस्थाको छविमा असर पर्न सक्छ । व्यवसायी तथा घरधनी संस्थाप्रति रुष्ट बन्न सक्ने अवस्था आउँछ ।‘
सुरक्षाको समस्या भएमा सुरक्षा निकायसँग समन्वय गर्न शर्माले सुझाव दिए । सोह्रखुट्टे र दरबारमार्गले विशेष सुरक्षा दिइरहेको उनको भनाइ छ । ‘ठमेलमा २४ घण्टा सुरक्षाकर्मी परिचालित छन् । केही भएमा तुरुन्त खबर गरेर समस्याको समाधान गर्न पहल गरिनुपर्छ,’ शर्माले अगाडि थपे ।
त्यसैगरी ठमेल पर्यटन विकास परिषद्का अध्यक्ष ध्रुव अधिकारीले जबर्जस्ती गरेर नभइ स्वेच्छाले दिनेसँग मात्र पैसा माग गरिएको उनले दाबी गरे । बैंकिङ् शैलीमा परिषद्ले पैसा उठाइरहेको उनको भनाइ छ ।
‘परिषद्ले पासबुक र रसिद दिएर पैसा माग गरिएको छ,’ अध्यक्ष अधिकारीले भने,’ सुरक्षा गार्ड राख्नका लागि पैसा मागेका हौ । ठमेललाई सुरक्षित गन्तव्य बनाउन र यहाँको वातावरणलाई व्यवस्थित तथा अनुशासन बनाउन पनि सुरक्षा गार्डले सहयोग गर्ने छन् ।‘
पैसा दिन्न भन्ने व्यवसायी तथा घरधनी पनि रहेको उनले सुनाए । ठमेल पर्यटन परिषद्का प्रतिनिधिले कसैसँग जबर्जस्ती गरेर रकम नमागेको उनले बताए ।
सुरक्षा गार्ड राख्दा यसका सकारात्मक पक्ष धेरै रहेको अध्यक्ष अधिकारीले बताए । अवाञ्छित क्रियाकलाप हुन लागेमा नेपाल प्रहरीलाई तुरुन्त खबर गरिदिने उनले बताए ।
परिषद्ले ठमेल प्रवेश गर्ने १२ वटा नाकामा सुरक्षा गार्ड राखेको छ । सुरक्षा गार्ड राखेपछि पर्यटकलाई दुःख दिने मानिस छैनन् र अवाञ्छित गतिविधि पनि कम भएको उनले विश्वास व्यक्त गरे ।

पर्यटकीय हब बन्दै मुस्ताङको मार्फा

मार्चमा एक लाख २१ हजार बढी विदेशी पर्यटक नेपाल आए, कुन देशबाट कति ?

अन्नपूर्ण आधार शिविरमा पुग्न थाले आरोही

पर्यटन प्रवर्द्धनका लागि नयाँ पदमार्ग निर्माणमा ‘टान’

मुख्य याममै सौराहामा आएनन् पर्यटक

न्यून ‘भिजिबिलिटी’का कारण एक सातादेखि उडान प्रभावित

‘नागरिक उड्डयन प्राधिकरण टुक्र्याउने विधेयक छिट्टै पारित हुन्छ’

प्रतिक्रिया