अभिलाषा विष्टलाई पाकिस्तानमा स्वर्ण

काठमाडौं : नेपाली टेनिस खेलाडी अभिलाषा विष्टले पाकिस्तानमा सम्पन्‍न आईटीएफ इस्लामाबाद जुनियर्स यु-१८ प्रतियोगिताको सर्किट १ मा शनिबार स्वर्ण पदक जितेकी छिन् ।  महिला डबल्सको फाइनलमा विष्टले रुसकी एरिना भालिटिभासँग मिलेर रसियाकी एकातेरिना सुभोरोभ र पाकिस्तानकी जोहा असिमलाई पराजित गर्दै नेपालका लागि पदक पक्का गरेकी थिइन् ।

महिला सिंगल्सको फाईनलमा भने अभिलाषा रुसकी एरिनासँग पराजित भएको नेपाल टेनिस संघका सदस्य अजय विष्टले जानकारी दिए ।

त्यस्तै, पाकिस्तानको राजधनीमा जारी प्रतियोगिताको पुरुष डबल्सतर्फ नेपालका आरभसम्राट हाडा र अकी जुवेन रावतले रजत पदक जिते । फाइनलमा हाडा र रावतको जोडी अमेरिकाका रोहन बेल्डे र एलेक्जेन्डर कर्मानसँग पराजित भएपछि नेपाल रजत पदकमै सिमित भयो ।

नोभेम्बर २३ देखि सुरु प्रतियोगितामा आयोजक पाकिस्तानसँगै नेपाल, रसिया, स्पेन, अमेरिका, बेलायत, अस्ट्रेलिया र जापानको सहभागिता रहेको सदस्य विष्टले जानकारी दिए । सर्किट-२ सोमबारदेखि सुरु हुने छ ।