कांग्रेस पदाधिकारी बैठक शुक्रबार सर्‍यो

फाइल तस्बिर

काठमाडौं  : नेपाली कांग्रेसको आज बस्‍ने भनिएको पदाधिकारी बैठक शुक्रबारका लागि सरेको छ । नेताहरूले प्रयाप्त तयारी नपुगेको बताएपछि सभापति शेरबहादुर देरउवाले पदाधिकारी बैठक शुक्रबारका लागि सारेका हुन् । देउवाको सचिवालयका अनुसार समय अझै निश्चत भएको छैन । 

क्रियाशील सदस्यता छानबिनमा देखिएको विवादबारे मापदण्ड बनाउने र समितिले मागेको पेश्कीका विषयमा छलफल गर्न पदाधिकारी बैठक बोलाइएको थियो । इकागजले पेश्की मागेको पत्रसहितको समाचार प्रकाशित गरेपछि त्यसबारेमा वरिष्ठ नेता रामचन्द्र पौडेलसहितका नेताहरूले सभापति देउवासँग जिज्ञासा राखेका थिए । बुधबार बसेको पौडेल समूहको बैठकमा पनि पेश्कीबारे कुरा उठेको थियो । 
 
बैठकले क्रियाशील सदस्यता छानबिनबारे मापदण्ड पारित गर्ने कार्यतालिका थियो । त्यसविषयमा नेताहरूले तयारी नपुगेको बताएपछि बैठक स्थगित भएको हो ।

कांग्रेसले क्रियाशील सदस्यता छानबिन गर्न केन्द्रीय सदस्य रमेश लेखकको संयोजकत्वमा एक समिति गठन गरेको थियो । देशभरबाट आठ लाख बढी क्रियाशील सदस्यको नाम सार्वजनिक गरिएकोमा पाँच हजार भन्दा बढि उजुरी परेका छन् । तर मापदण्ड बनाउन नसक्दा समितिले अधिकांश उजुरीमाथि छानबिन गर्न सकेको छैन ।

समितिले पदाधिकारी बैठकबाट क्रियाशील सदस्यता छानविनबारे मापदण्ड बनाउन भन्दै यसअघि नै ड्राफ्ट बुझाइसकेको छ ।